A l'entschatta da ses process sajan stadas poppas da sex senza chaus. Quellas hajan surmanà Martina Clavadetscher a reflexziuns davart la moda artifiziala programmada da carstgauns e l'atgna vita da roboters. La finala hai dà il cudesch «Dier Erfindung des Ungehorsams».
Quai saja senza dubi il cudesch il pli original che saja vegnì nominà quest onn per il premi e quel saja er sa mess trass cun raschun, suenter che Clavadetscher saja gia stada sin la shortlist cun ses roman «Knochenlieder».
In cudesch ch'ins sto fadiar
En ses roman ha ella cruschà pliras istorgias. I dat Iris a Manhattan, a sia dinnerparty vegn raquintada l'istorgia da Ling, che lavura en ina fabrica da poppas da sex en la China. Lura sa chattan ins tuttenina en il 19avel tschientaner tar Ada Lovelace, ch'i ha propi dà – ina piuniera da la lingua da programmar.
Cun quai è gia fatg attent ch'ins sto fadiar quest roman. Ins vegn tgunsch or dal flad cura ch'ins mida tras ils tschientaners e continents e mintgatant han ins il basegn da returnar a la moda veglia da l'unitad cun agir, lieu e temp, ch'è vegnida ord moda.
Sch'ins sa lascha dentant en sin l'aventura cun il cudesch da Clavadetscher, lura svaneschan ils cunfins tranter il programmà e l'uman. En il roman han las figuras umanas savens insatge artifizial. En lur mintgadi dominescha l'unifurmitad. Ma a las poppas da sex programmadas attesteschan ins adina dapli umanitad, e l'abilitad da malobedir – quai che ha er dà il titel al roman.