L’emprendissadi ha el fatg sco electricist, lura reparà durant 10 onns da tuttas sorts maschinas, sco per exempel maschinas da lavar. Tras in bun ami ha el chattà la via en il sectur da sanadad, in mund dal tuttafatg auter.
Il mastergn sco sanitari da salvament è fitg engraziaivel. Ti poss gidar la glieud e lungurus vegni mai.
Per pudair sa revegnir e vegnir sin auters patratgs scappa Marco Bass savens en il Tessin nua ch’el e sia famiglia possedan dapi intgins onns ina rulotta ch’el ha transfurmà en ina pitschna chasa. Il clima, l’atmosfera e la vita en il Tessin cun il Lago Maggiore saja per in paradis per puspè tancar nova energia.
Senza la musica na va nagut
A cor a Marco Bass stat era la musica, cunzunt la musica instrumentala. Blers onns è el stà commember da la societad da musica Sumvitg/Cumpadials. Oz suna el en la musica da la citad da Glion nua ch’el è da chasa. Dapi prest 16 onns abitescha Marco Bass en la Via Schlifras, in quartier ruassaivel a l’ur da la citad. Per famiglias è il quartier ideal grazia a la vasta purschida en la vischinanza sco il bogn avert, las plazzas da ballape, las plazzas da gieu, la scola e differentas butias.