Marella - «Bucket list» – ils siemis da la vita

Els tuts han insatge communabel – els han siemis da la vita, ubain els han gia realisà da quests siemis. La «bucket list» persunala, quella para da savens esser sulettamain en il tgau.

Faye Dominique Koehler raquinta tranter auter dad in da ses gisvisch ch'ella ha pudì realisar l'enviern passà. Avrir in'atgna ustaria da gourmet. Quest siemi è paucs mais pli tard dentant gia passà. Ina dira decisiun saja quai stà, dentant la situaziun actuala cun il covid-19 n'haja betg pussibilità da far bler auter en quella situaziun. Ella guarda dentant cun curaschi enavant.

René Cavegn, el raquinta d'in siemi realisà, in pelegrinadi a Santiago de Compostela. Sin quest viadi ha el chattà ina ruassaivladad. Turnà, haja el gì il sentiment d'avair tut il di in surrir en fatscha. Spert dentant turnia il trot dal mintgadi.

Claudia Bearth di, ch'ella saja plitost ina dals pitschens giavischs. Dentant ussa, ch'ella è pensiunada saja era temp da realisar intginas chaussas. Per exempel in viadi en Grezia ubain forsa emprender englais. Sulet, pachetar la valischa, quai na fa ella betg gugent.

Madlaina Manetsch e sia figlia Ceylin Sönmez avain nus inscuntrà a Turitg e discutà da blers siemis. Davent dal cudesch gia scrit che sa chatta en truclet enfin las paraids coluradas ed il viadi enfin Istanbul cun il velo. Era las tartarugas han ina impurtanza speziala.

Reto Schmid, il pasterner da Sedrun, para da spustar blers siemis sin la pensiun. Quai era sch'el di sez, che la pensiun na saja per el betg in temp nua ch'el na lavuria betg pli. Sisum la glista dentant – il maridar.