Siglir tar il cuntegn

Header

audio
Dapli che «miau» e «wau» – umans che discurran cun animals
Or da Marella dals 27.11.2022. Maletg: MAD
laschar ir. Durada: 52 minutas 2 Secundas.
cuntegn

Marella Dapli che «miau» e «wau» – umans che discurran cun animals

Communicaturs e communicaturas d'animals pretendan da pudair communitgar cun tut ils animals tras telepatia. La Marella fa in viadi en il mund fascinant, ma era dispitaivel da la communicaziun cun animals – e fa insaquantas experientschas e scuvertas remartgablas.

Strusch insatgi che posseda in animal da chasa u da niz – giat, chaun, ubain chaval – metta en dubi ch'igl exista per il solit in ferm liom emoziunal e communicativ tranter possessura ed animal. Igl è ina sort communicaziun che va pli lunsch che da far cumonds sco «sesa» u «plaz» e far obedientscha a quels.

Discurrer cun animals grazia a telepatia?

In pass pli enavant van uschenumnads communicaturs u communicaturas d'animals. Quellas persunas pretendan da pudair communitgar cun tut ils animals pussaivels. Fitg concretamain, cun far dumondas, survegnir respostas u cun badar lur emoziuns. Quai è sco ch'i para pussaivel grazia ad abilitads telepaticas. E – grazia a scolaziuns. Mintga persuna possia numnadamain emprender a communitgar cun animals.

Jau na discur betg simplamain uschia cun in animal. Jau dumond adina per ses consentiment. I dovra bler'attenziun e temp. E mintgatant datti animals che n'han nagin gust da discurrer cun mai.
Autur: Patrizia Plaz communicatura d'animals

Ina dumonda da la seriusadad

La purschida dals communicaturs d'animals è tschertgada, adina dapli er en il Grischun. Possessuras d'animals vulan rinforzar il sensori per lur animals ed han adina pli gronda confidenza en medischina alternativa. Quai fa dentant era pli e pli mal il venter a las persunas che lavuran en la medischina classica veterinara.

La spierta è gronda ed i dat bleras nursas nairas en questa fatschenta. E perquai sa fidan possessurs d'animals da temp en temp er a las valitaziuns da las faussas persunas. Qua pateschan a la fin per il solit ils animals.
Autur: Gianina Guetg pura ed assistenta da veterinari

Ina Marella che surpassa ils cunfins da l'explitgabel

In veterinari ed in'assistenta da veterinari vegnan a pled en questa Marella, gist sco in biolog che ha di ch'el haja fatg studis surprendents sin il champ da la telepatia. E la Marella guarda sur la spatla a communicaturas d'animals ed emprova d'explitgar l'inexplitgabel.

E tgi sa sche nossa redactura vegn sezza er da communitgar cun in cunigl?

Marella 09:00

Artitgels legids il pli savens