Siglir tar il cuntegn

Header

audio
Tartuffels - «Datti or bain?»
Or da Marella dals 25.09.2022. Maletg: W. Zeller, Fototeca dal DRG
laschar ir. Durada: 33 minutas 46 Secundas.
cuntegn

Marella Tartuffels – «Datti or bain?»

Cun talas frasas* salidavan ils purs da tartuffels in l’auter pli baud en Rumantschia. Savens era quai il cas avant 250 onns, damai che alura – cun la fomina dals onns 1771 enfin 1773 – han ils tartuffels conquistà las maisas en il Grischun.

Per vegnir sin ils plats dals Grischuns e da las Grischunas ha il tartuffel dentant stuì surmuntar ina via stentusa. Ina lunga via da lontan, flancada da sceptica, dolurs e fomaz. Ed era varsaquantas sfidas linguisticas ha il tartuffel stuì dumagnar.

Pir las miserias da fomaz han effectuà ina midada, ins ha finalmain apprezià il tartuffel.
Autur: Andri Casanova documentalist DRG

Suenter ch’il tartuffel era dentant s’etablì sco mangiativa, è el avanzà pli e pli ad in dals aliments centrals en l’entira Europa. Ins pudess dir, in vair drama da tartuffels.

Planta e bulba misteriusa

Tgi che di uss anc ch’il tartuffel saja in legum lungurus ed antiquà, raquinta ina detga buglia! Primo n’è il tartuffel per propi gnanc in legum. Secundo datti vairamain da scuvrir numerus misteris davart ils uschenumnads patatis – uschiglio avessan nus strusch pudì emplenir in’entira Marella cun quel tema.

Sche jau contemplel la planta dal tartuffel, bad jau ch'ella ha insatge exotic. Ch'ella na vegn oriundamain betg da qua.
Autur: Marcel Heinrich pur da tartuffels

In viadi gustus e varià en il mund dal tartuffel


E perquai fa la Marella ina decleraziun d'amur al tartuffel cun in viadi culinaric ed istoric-cultural en il mund da la bulba mistica. Ella raquinta, pertge ch’il tartuffel è daventà uschè impurtant en l’economia e la sociocultura grischuna, pertge ch’el ha tants nums, pertge ch’el ha gì e ha er oz anc blers inimis, pertge che cunzunt sorts veglias dal tartuffel han in agen caracter e pertge ch’il tartuffel porta ina chamischa en tschertas parts da la Rumantschia.

Il tartuffel ha fatg ina carriera remarcabla en noss lungatg, e quai en plirs connex.
Autur: Silvana Derungs redactura DRG
Il recept da Put a suolch da Nesa Valentin.
Legenda: Il recept da Put a suolch da Nesa Valentin. RTR, Olivia Spinatsch

* Indicaziun da la funtauna: DRG 

Marella 09:00

Artitgels legids il pli savens