Marella - Ervas muntagnardas – sco apoteca ed en cuschina

Quai ch’è per bleras viandantas e blers viandants mo «verd» a l’ur da la via, è per Astrid Thurner in cudesch avert. Dapi passa 40 onns gira l’anteriura droghista, omeopata e manadra da viandar tras il mund muntagnard grischun. A Savognin ans maina ella ad in’excursiun che surpassa per bler las determinaziuns da plantas.

In stgazi davant noss pes

Astrid Thurner sfunsa cun nus en in mund ch’ans è en sasez enconuschent e tuttina uschè nunvesaivel. La dunna da 72 onns da Savognin è in lexicon sin duas chommas. Cun l’experientscha da quatter decennis declera ella tge erva che gida tar mal il chau, tge plantas ch’èn indispensablas en la medischina moderna e da tgeninas ch’ins lascha meglier la detta.

Tar Astrid na resti dentant betg tar la teoria: durant ina spassegiada rimnain nus las ingredienzas per ina salata selvadia da muntogna – frestga e sauna e directa dal fund da las Alps.

Tar quest recept na datti naginas decleraziuns da mesira. I vegn racoltà tenor sentiment e fom. Cura ch’ins ha tut las ingredienzas, las lavan e manizz'ins. Tar il timian alpin vegn la feglia pitschna per la salata, tar la cicoria vegn tagliada davent la part alva, la flur-portg vegn stratga dapart e las ulteriuras ervas tagliadas en buccadas. Uss anc far la sosa da salata preferida, maschadar tut e servir. In bun appetit.

Bunas substanzas amaras

En questa salata è sur tut la cicoria fitg amara. Blers n’han betg gugent quai amar, ma en sasez èsi fitg sanadaivel. Las substanzas amaras stimuleschan l’entir tract digestiv ed èn perquai spezialmain sanadaivlas. Ellas promovan la producziun da spida sco era da products da digestiun en il magun, il gnirom, la vaschia dal fel, la pancrea e la beglia.

Sin noss corp han substanzas amaras perquai in effect bainvulent e vitalisant. Ultra da quai pon substanzas amaras avair in effect ch'impedescha inflammaziuns, pon dischintoxicar, èn antioxidativas ed èn anticonvulsivas.

Podcast Marella

Nus dain in cuc davos las culissas, explitgain e mettain en context, sajan quai fenomens novs, u istorgias pac enconuschentas.

Ulteriurs audios e podcasts