Siglir tar il cuntegn

Header

audio
Il goli – tranter erox e tabalori
Or da Marella dals 12.06.2022. Maletg: RTR/MAD
laschar ir. Durada: 37 minutas 27 Secundas.
cuntegn

Marella Il goli – tranter erox e tabalori

Els èn quels che pon decider persul in gieu – saja quai cun paradas miraculusas u cun sbagls fatals. In sguard davos las culissas da questa fascinaziun dad esser golia u goli.

Els èn in zic battaglinas, spinochels u simplamain auter ch'ils giugaders – pleds ch’ins auda savens davart ils golis. Tuttina, sch'i sa tracta d'in goli da ballape u da hockey sin glatsch. Ma è quai propi uschia? Cler è ch’ils golis èn ils sportists singuls en in sport d’equipa. Els èn savens per sasezs, ed han tut in'autra rolla ch’il rest da l’equipa. Exact quai fa però era part da la fascinaziun.

Esser goli è ina passiun

Dario Caduff e Flurin Capaul han omadus 27 onns, èn omadus oriund da Laax, ed èn omadus golis. Dario Caduff è goli da hockey sin glatsch tar Partenz-Signuradi, e Flurin Capaul è goli da ballape tar Schluein Glion. Sper la derivanza partan els era la passiun dad esser in goli. Els èn omadus gia dapi ch'els èn buobs golis.

Sco goli pos esser il mister 50% e bunamain far empaglia ils attatgaders.
Autur: Dario Caduff goli da hockey sin glatsch
audio
Ils golis – Da la fascinaziun dal defender la porta
ord Actualitad dals 09.06.2022.
laschar ir. Durada: 4 minutas 48 Secundas.
Ins dat il sport d'equipa, ma è tuttina insatgi spezial. E quest pensum spezial è exact quai che fa ora dad esser goli.
Autur: Flurin Capaul goli da ballape
audio
Ils golis – Dal squitsch e las sfidas sin la lingia dal gol
ord Actualitad dals 09.06.2022.
laschar ir. Durada: 4 minutas 55 Secundas.

Flurin Capaul sco er Dario Caduff enconuschan omaduas varts da la medaglia. Ils muments, cura ch'ins è cun paradas miraculusas l'um dal gieu, dentant era ils muments, cura ch'ins fa sbagls decisivs e perda perquai in gieu. Quai saja oramai la vita d'in goli.

Spezial vi da la posiziun da goli è plinavant che l'aspect mental gioga ina gronda rolla. «Tes pli grond adversari è tes chau», manegia Dario Caduff. Sco goli è il privel grond da far da memia patratgs, da far da memia squitsch a sa sez. Er la tema da far sbagls è tar golis pli marcanta che tar giugaders. «Sch'ins lascha vegnir datiers questa tema, lura capitan sbagls», di Flurin Capaul. Cun ils onns emprendian ins dad ir enturn cun sbagls, e co reagir sin els.

Igl è sco di e notg, sch’ins cumpareglia il goli dad oz cun quel d’avant 30-40 onns.
Autur: Damian Arpagaus trenader da golis US Schluein Glion

Posiziun fitg cumplexa

Durant ils temp ch’el saja stà activ – ils onns 80 e 90 – era in goli sin lingia, tranter las pitgas e tegneva ballas, di Damian Arpagaus, trenader da golis tar la US Schluein Glion. Bler dapli n'aveva el betg da far. Ozendi saja bunamain pli impurtant ch’el haja dus buns pes che buns mauns da pigliar la balla. Il goli modern sto era giugar, è atgnamain l’ultim defensur e plinavant era l’emprim attatgader.

purtret da Damian Arpagaus sper la plazza da ballape
Legenda: Damian Arpagaus Per il trenader da golis da la US Schluein Glion han las incumbensas e strategias da golis midà cun l'ir dal temp. RTR, Gian Carlo Candinas

80% na tanschan betg

In goli possia sa lubir bler pli pauc ch'in giugader, di il psicolog da sport Robert Buchli. Sco giugader èsi adina pussaivel da sa zuppar in zic – sco goli na giaja quai betg. 80% na tanschan betg. Sco goli èn ins adina en il focus, tuttina sch'igl è ballape, hockey sin glatsch u er unihockey. Plinavant saja quai impurtant dad esser ina ferma persunalitad, spezialmain sch'ins dat sin nivel professiunal.

Robert Buchli
Legenda: Robert Buchli Il psicolog da sport accumpogna differents golis professiunals ord differents sports en sia professiun. RTR

Il goli – la persuna ch'è dumandada psichicamain pli fitg che corporalmain. Pudair lavurar si gieus, nua ch'ins ha fatg sbagls, saja insatge impurtant per in goli ed er bler pli grev che da sa revegnir dad ina blessura.

Lavurar si sbagls è segir pli dir per in goli che da sa revegnir dad ina tomata.
Autur: Robert Buchli psicolog da sport

Il goli sin nivel mundial

En il sport professiunal han golis gia scrit numerusas istorgias ch'èn idas en las annalas – da moda positiva sco er negativa. Yann Sommer, Oliver Kahn u Leonardo Genoni – nums da golis che han scrit istorgias singularas. En la galaria da fotografias chattais ina pitschna tscherna.

RTR actualitad 06:00

Artitgels legids il pli savens