Ils 24 da favrer 2022 è in di, che ha midà tut. In di istoric, ina midada epocala. Avant in onn sa sfruschava il mund ils egls. Schurnalistas e schurnalists rapportavan en chapellina e gilets da salvament verd, avant maletgs cun sajettas oranschas ed emprimas muschnas.
Panzers, politichers, parolas per far curaschi e parolas per prender curaschi han dominà las lingias grassas e dapertut vesev’ins umans desperads. Tranter quels eran er Lilya Havrylova e Yuliia Nekriach.
Dus dunnas, in destin – la fugia
Ils 23 da favrer 2022 avevan la magistra Lilya e ses um anc fatg festa, igl era lur di da nozzas. Ils 24 da favrer ha el stuì turnar en l’armada ucranaisa. L'advocata Yuliia era responsabla da resursas umanas per ina firma da passa 1'700 persunas e steva cun ses um ed ils dus figls sper Kiev.
Oz stattan ellas tuttas dus cun lur uffants en il Grischun. Lur umens èn restads en l’Ucraina. In en l'armada, l'auter tar ils pumpiers. Nagut n’è pli sco quai ch’igl era. En la Marella raquintan las dunnas da lur vita en il Grischun e quant bel ch’igl è, sch’ins na sa betg metter avant co che la guerra è per propi.
