Ses tat Simon Juon emigrescha il 1826 da Masein en Lettonia per daventar conditer. Ses bab Theodor Juon fa carriera sco um da fatschenta a Moscau. Il giuven Paul sesa d’uffant sut il clavazin da sia mamma per sa laschar purtar da las melodias. Ed igl è gia lura cler che la passiun per la musica vegn in di a daventar ses mastergn.
Suenter studis da musica en Russia ed in onn sco magister a Baku (ozendi en l’Aserbaidschan) sa renda il giuven a Berlin, nua ch’el viva e lavura durant bunamain quatter decennis. Ils ultims onns da sia vita passenta el en Svizra, nua ch’el mora il 1940.
Paul Juon è in viandant tranter differents munds – che quels sajan lura geografics, politics ubain musicals.
La musica da Paul Juon
Sia musica cuntegn bler: resuns d’ina uffanza en Russia, umor, sensualitad ed elements che furman ina punt tranter romantica tardiva e moderna.
La musica da Paul Juon n’è betg uschè enconuschenta sco quai ch’ella avess merità.
En il decurs da sia vita survegn Paul Juon varsaquants premis e blera renconuschientscha per sias cumposiziuns. Durant ils decennis suenter sia mort va ses opus dentant in zic en emblidanza. È quai pervia da sia vita tranter naziuns e culturas? Ubain forsa era pervia da ses stil che na para betg «modern» avunda per il suenterguerra?
Dapi ils onns 90 chatt’ins puspè pli savens ovras da Paul Juon sin programs da concert. Enconuschentas èn cunzunt sias ovras da musica da chombra (che furman era quantitativamain la gronda part da l’opus). A chaschun dal 150avel anniversari dal cumponist vul la Societad internaziunala Paul Juon dentant dar in stausch a sias ovras per orchester: Bainprest vegn a cumparair in’ediziun che cuntegna diversas ovras nunpublitgadas.
