Essan nus vairamain sin ils fiers? Pertge sa sentin nus sfinidas e sfinids? Tge è restà dal social distancing e tge vul quai dir per nus, sch'igl cumpara – exact cura che nus avevan sperà che la pandemia giaja vers la fin – la guerra en Ucraina?
La Marella è sa messa en tschertga da respostas – cun trais dunnas che s’occupan mintgina en sia maniera dal bainstar da las Grischunas ed ils Grischuns.
Pina Augustin – terapeuta da respiraziun e corp
Ella che sa tge che nus pudain far, sch’ans manca il flad:
Per exempel exercitesch jau cun la glieud da puspè susdar. Pertge che susdar è in reflex fitg natural che gida da regular.
Er tar Pina Augustin èsi sco en tut la branscha da terapeutas e terapeuts: Ella n'ha quasi betg pli termins libers. Il basegn da cussegliaziuns da tut gener è aut. Talmain blera glieud tschertga sustegn e dovra agid per lur sanadad psichica.
Sereina Venzin – psicoterapeuta
Ella fa endament ch'i vul trenament per survegnir dapli cundiziun mentala:
Igl è adina lavur. Restar psichicamain saun è lavur.
Sereina Venzin è psicoterapeuta e lavura er per ils Servetschs psichiatrics dal Grischun. Ella discurra da la suldina – che resulta da la discrepanza da contacts effectivs e contacts giavischads. Quai che tuna sco ina furmla matematica ha consequenzas rigurusas per la sanadad mentala e po manar a disturbis da temas e depressiuns.
Kerstin Stocker – coiffeusa
Ella sa ch’ina frisura è bler dapli che mo in mantun chavels:
Ils chavels èn insatge impurtant per il bainstar da l’uman. Perquai che sche la frisura n’è betg co quai ch’ella avess dad esser, na stat la persuna n’er betg bain.
Nus sa regurdain – al cumenzament da la pandemia è las coiffeusas ed ils coiffeurs enina cumparids en il focus public. Ils chavels eran creschids, las frisuras vegnidas ord furma e la svizra daventada grischa. E betg be quai. I mancavan cafés, gasettinas e discurs.
Ed ussa, cur che la pandemia pareva dad ir vers ina fin, vegn la guerra en l’Ucraina. La glieud n'haja betg pli forza, da sa confruntar uss er anc cun tut las nauschas novas da l’Ucraina – igl è sco entschaiver in nov maraton, avant ch’il vegl è a fin.