Il Waldhaus Vulpera n’exista betg pli. Oz regorda anc in bigl, amez ina surfatscha verda ed intgins pilasters solitaris vi da la grondezza dad ina giada. E tuttina viva el vinavant, quest Waldhaus, sco legenda en la memoria da blera glieud.
Actualmain è el puspè en las lingias grassas. Questa giada betg, pervi ch’igl è puspè passà ina cifra dad onns radunda suenter sia fin, suenter l’incendi dal 1989, ma pervi dad ina cartoteca da trais stgatlas. Trais stgatlas, che cuntegnan 20’000 cartinas da giasts. Quai èn 20’000 differents destins ed in unic numnader cuminaivel, il Waldhaus.
Rolf Zollinger, l’ultim directur dal Waldhaus, ha decis, da publitgar las cartinas. Quai ha el fatg ensemen cun il fotograf austriac Lois Hechenblaikner e l’istoricra da cultura Andrea Kühbacher.
Il Waldhaus viva vinavant er en la memoria da l’hoteliera ed affarista Annatina Pinösch, descenta da la dinastia d’hoteliers Pinösch che aveva surpiglià ed expandì la pitschna fracziun purila da Vulpera ad in lieu da renum internaziunal per la haute-volèe europeica.
audio
Il Waldhaus Vulpera – fastizs d’ina legenda
39:55 min, ord Marella dals 30.05.2021.
Maletg: RTR, Isabelle Jaeger