Siglir tar il cuntegn

Header

audio
«La relaziun persunala è fundamentala per l’emprender»
Or da Marella dals 31.05.2020. Maletg: Keystone
laschar ir. Durada: 44 minutas 29 Secundas.
cuntegn

La Marella «La relaziun persunala è fundamentala per l’emprender»

Mintgin da nus ha gì tozzels magisters en sia vita. Quant impurtanta è la relaziun che nus avain (gì) cun quels?

En noss’uffanza passentain nus circa uschè bler temp en scola sco a chasa. La relaziun persunala cun noss magisters lascha pia senza dubi enavos fastizs – positivs ubain era negativs.

Quant impurtanta è ina buna relaziun? È ella indispensabla ubain gist «nice to have»? Tge sa la scienza davart l’influenza da talas relaziuns sin l’emprender da l’uffant? Quant conscients èn magisters da l’influenza che la relaziun persunala ha sin l’emprender?

La Marella ha tschentà questas dumondas a dudesch pedagogas e pedagogs. Els/ellas raquintan da lur experientschas persunalas e portan exempels: da lieurs da Pasca zuppadas en furmiclers, d’in pitschen regal d’ina magistra cun gronda muntada, d’ina magistra che daventa madritscha e dal bel pled che nus avain en rumantsch: «la clamada»!

Las vuschs da questa Marella:

Avrir la box Serrar la box

Angelica Gartmann è mussadra da scolina en il chantun Soloturn. Per ella n’hai mai dà in’autra opziun.

David Flepp è anteriur scolast secundar (in strict, sco el di). Ozendi lavura el sco promotur da cultura tar la Lia Rumantscha ed era sco actur e pedagog da teater.

Elsa Cavegn sa regorda fitg bain da si‘emprima magistra ch’è era daventada sia madritscha. Elsa è magistra en team-teaching en il chantun Son Gagl. Ella dat era uras da sustegn, uras da promoziun, porscha terapia da legastenia e discalculia.

Flavia Acosta Fox lavura per il mument en ina fatschenta da palantschieus a Miami (USA). Ma ella lascha encrescher per la scola e turna en pauc temp en questa clamada.

Francesco Trippolini è mainaproject da furmaziun professiunala. Ils ultims dus onns ha el lavurà vid in concept da furmaziun per emprendists da commerzi en detagl dal Coop.

Marina Bearth è en ses segund onn sco magistra. Entras il lockdown ha ella realisà ch’ella aveva propi tschernì la dretga professiun!

Martin Gehrig è docent da pedagogia a la Scol’auta pedagogica dal Grischun.

Pauli Dosch è stà inspectur da scola durant 19 onns ed avant aveva el lavurà 23 onns sco magister. Ussa è el en pensiun e sto anc s’endisar vidlonder...

Selina Derungs porta gist trais «chapellas» da scolasta: ella è magistra da flauta traversa, magistra dad ina 4. classa e magistra da tudestg sco linguatg ester.

Sereina Nay è scolasta e pedagoga curativa. Per il mument fa ella ina substituziun en ina scola speziala per uffants cun difficultads psicosocialas.

Silvio Dietrich ha emprendì da scolast primar. Ussa è el mainascola ed ha dacurt sviluppà ina purschida da cussegliaziun sistematica per scolas e tut ils singuls cumpigliads.

Thomas Cathomen guarda la fotografia da sia classa cura ch’el dovra motivaziun. El lavura sco magister en la scola bilingua a Glion.

Artitgels legids il pli savens