En il center da l’emissiun stattan dus cudeschs, nua che duas protagonistas descrivan a moda fitg precisa in tschert temp da lur vita. Preschentads vegnan ils romans «Resto qui» da Marco Balzano e «Mutter. Chronik eines Abschieds» da Melitta Breznik. Ils giasts dal Magliacudeschs èn questa giada las duas lecturas passiunadas Marcella Pult e Christina Caprez.
«Resto qui»
L’autur talian Marco Balzano ans maina sin il Pass dal Raisch u Reschen nua che l’istorgia da Trina è ambientada. La dunna descriva il temp burascus en la regiun dal Tirol dal sid enturn la segunda guerra mundiala. Ses diari scriva ella per sia figlia ch’era sparida in bel di.
Credevo che mi potessero salvare, le parole
«Mutter. Chronik eines Abschieds»
En il cudesch descriva Melitta Breznik, che viva e lavura sco psichiatra en Engiadina Bassa, ina dunna che accumpogna sia mamma las davosas emnas avant la mort. Sentiments d’affecziun sa maschaidan cun regurdanzas vi da conflicts che na vegnan betg pli schliads.
Il tip
Il tip dal Magliacudeschs Flurin Caviezel è «Irrland» da Margrit Sprecher. Il cabarettist e musicist tradescha pertge che questa collecziun da reportascha n’è betg propi adattada per la maisina da notg.
