Marellas da stad – «dunnas» - La poetessa pioniera Clementina Gilly

Tgi era quest’emprima dunna rumantscha ch’ha publitgà atgnas poesias – e quai era sut il pseudonim «Clio»? Pertge èn ses diaris scrits per gronda part en talian? Tge mument da sia biografia ha fatg ch’ella è daventada ina piuniera dal moviment feministic en l’Engiadina?

Clementina Gilly è stada ina pioniera en pliras domenas da sia vita, ina «randulina» engiadinesa che ha laschà enavos sur 150 lavurs litteraras, da la poesia a l’artitgel per la gasetta «Fögl d’Engiadina». Ella s’ha engaschada fermamain era per la furmaziun da las mattas e s’ha posiziunada sco pacifista decisa cunter la guerra.

Ella ha publitgà l’emprima giada pir cun 50 onns, cun sia lavur da poetessa e traductura ha ella fat via per otras dunnas scripturas. Seis cudesch da poesias chi d’es cumpari l’onn 1926 porta glistess il titel tut modest: «Fruonzla».

En quest’emissiun vegn a pled Rico Valär (professer per cultura e litteratura rumantscha a l’universitad da Turitg) che ha lavurà si il relascha da Clementina Gilly ed ha publitgà ensemen cun Annetta Ganzoni ed Edith Prescott il cudesch «Clementina Gilly – Traunter di e not» tar la Chasa Editura Rumantscha.

Questa Marella è vegnida realisada l’onn 2022 dad Astrid Alexandre.

Sumsunar, sfruschar e sautar – l’univers dad Evelina Cajacob

L’univers da l’artista grischuna Evelina Cajacob è giughentà, subtil ed adina puspè avantgardistic. L’artista multimediala uriunda da Sumvitg è dapli decennis ina vusch impurtanta e pregnanta entaifer il mund da l’art Grischun e fascinescha cun dissegns poetics, lavurs da video emfaticas ed in’affinitad per lavurs da man.

Quai constatescha l’autur da quest’emissiun Donat Caduff suenter che el ha manà plirs discurs cun l’artista Evelina Cajacob.

Tar sias lavurs las pli caracteristicas tutgan ils dissegns filigrans da rispli. L’inspiraziun prenda Cajacob savens da texturas da la natira: da guauds, tailas-filien u flurs. Ella na vul però betg simplamain mussar la bellezza dal mund. Ils dissegns restan savens imperfetgs ed abstracts, u irriteschan entras las dimensiuns che varieschan tranter pitschnas skizzas ed ovras spaziusas ch’emplainan entiras stanzas.

Questa «Marella» e vegnida realisada l’onn 2020 da Donat Caduff.

Fausta Capaul – la dunna ch’ha lantschà il turissem a Breil

Il matg 1873 ha la giuvna Fausta Capaul da Breil laschà publitgar ina reclama en la gasetta «Der freie Rhätier» per sia nova ustaria, la Casa Fausta Capaul – ed ha procurà uschia per ina pitschna sensaziun mediala. Ils emprims giasts n’han betg laschà spetgar ditg e Fausta Capaul ha lantschà uschia il turissem en la destinaziun dad oz «Breil Vuorz Andiast».

La dunna emancipada ha segirà uschia sia vita – ed ultra da quai era quella da bleras generaziuns suandantas.

Funtaunas directas da Fausta Capaul datti strusch, ma grazia a funtaunas secundaras emprova la «Marella» da purtretar questa dunna curaschusa, quai cun agid da Michael Friberg (Forum Cultural Breil) e cun duas vuschs or da l’archiv da radio; quella dad Otto Friberg (figliol da Fausta Capaul) e dad Elsa Friberg (successura da Fausta Capaul).

Questa «Marella» è vegnida realisada l’onn 2023 dad Astrid Alexandre.

In femicidi brutal en Surselva l’onn 1847

Al cumenzament da questa «Marella» stat ina bara. Il corp maltractà tutga a la giuvna dunna en speranza Maria Catrina Derungs da Trun. Quest cas criminal ch’è capità avant 178 onns ha scrit istorgia – ma betg be pervi dal destin trist da la victima, mabain pervi da l’assassin.

El garegia ella. Ella sa lascha surmanar. Ella vegn en speranza e pretenda ch’el maridia ella. El na vul betg, ed uschia mazza el ella. Uschia fiss raquintada la varianta la pli curta da questa istorgia tragica: in tipic femicidi – che fiss bunamain ì en emblidanza. In da blers. Ch’il num da la victima – Maria Catrina Derungs – è insumma enconuschent fin il di dad oz ha da far cun ses assassin: Giachen Condrau Spescha. Quel ha scrit istorgia sco ultima persuna ch’è vegnida stgavazzada en Grischun. E perquai ans regurdain nus dal destin da la dunna da Trun. La redactura Astrid Alexandre ha retschertgà per questa «Marella» ils fatgs ed ils motivs da quest cas criminal istoric – ensemen cun l’istoricher Martin Camenisch e l’autur Rico Tambornino ch'ha elavurà quest cas en furma litterara en sia publicaziun «Il scutinem dallas olmas».

Questa «Marella» è vegnida realisada l’onn 2018.

Questa stad tutga a las dunnas

Questa stad laschain nus reviver las vuschs ed istorgias da differentas dunnas grischunas ch’han prestà lavur da pioniera, ch’han muventà u che muventan anc adina cun lur esser u lur moda, dunnas curaschusas da differentas epocas, dunnas cun destins pesants, dunnas che persequiteschan lur passiuns. Nus repetin «Marellas» che han purtretà dunnas che han fatg furora, dunnas che laschan enavos fastizs – pli pitschens u pli gronds.

Ulteriuras dunnas en las Marellas da stad :

L’artista Evelina Cajacob, la musicista Corin Curschellas, la scriptura Luisa Famos, la pioniera Clementina Gilly e la randulina Ida Spinnler.

Podcast Marella

Nus dain in cuc davos las culissas, explitgain e mettain en context, sajan quai fenomens novs, u istorgias pac enconuschentas.

Ulteriurs audios e podcasts