La participaziun dals Furbaz a l’ESC è sa dada. Ils Furbaz chantavan sco studenta e students en l’hotel Cucagna a Mustér per ils giasts. Ina saira era ina raspada dal Radio Rumantsch preschenta.
Nus essan in zic pli exots, insatge spezial.
Suenter lur preschentaziun èn ils Furbaz vegnids dumandads, sch’els vulessan participar a la selecziun Svizra da l’ESC (lura anc Concours Eurovision de la chanson).
Nus avain registrà «Da Cumpignia» en il studio da RTR a Cuira ed avain bunamain piglià tema cura ch’igl ha gì num che nus pudain participar a la selecziun Svizra.
Cun «Da Cumpignia» han ils Furbaz fatg plazza trais a la selecziun svizra il 1987. Cun «Sentiments» èni in onn pli tard vegnids segunds, davos Céline Dion. E cun «Viver senza tei» hani gudagnà il 1989 la selecziun svizra e pudì represchentar la Svizra a l’ESC.
Suenter il final hai dà in grond travasch e bleras dumondas per engaschis. Il success è vegnì enorm spert. Be dus onns pli tard, sin il punct culminant, han ils Furbaz decidì da chalar e quai cun in disc cumpact cun chanzuns da Nadal.
Sin il punct culminant avain nus decidì da chalar.
Nadal è lura era pli tard puspè stà in grond tema tar ils Furbaz. Per ir sin turnea cun chanzuns da Nadal èn els blers onns pli tard sa reunids.
Sco quai cun l’ESC è era quai cun las chanzuns da Nadal sa dà.
Suenter la separaziun dals Furbaz il 1991 è la carriera musicala ida vinavant per Marie Louise Werth persula. Igl ha duvrà blera gnerva e temp. Ed igl è stà in dir temp.
Ils emprims dus onns èn stads fitg dirs.
In dir temp saja era stà quel da corona. Artistas ed artists hajan quasi gì in scumond da lavurar, era cun consequenzas finanzialas. Suenter corona saja stà da cumenzar tar nulla.
Marie Louise ha passa 20 onns ina segunda passiun che mo ils pli paucs enconuschan, il malegiar. Action Painting numna ella quai ch'ella fa. Malegiar senza studegiar bler, far simpel, eruptiv, impulsiv. Sin l'idea è ella vegnida tras in scolar e lura ha ella pensà dad era empruvar ina giada. Igl ha tschiffà ella. Durant quels 20 onns èn sa rimnads blers maletgs. Avant dus onns ha ella lura, atgnamain sco gag, fatg in'exposiziun. Ed ussa è ella gist vi da preparar la terza per l'atun che vegn.