Enstagl sin tribunas grondas, gioga Mario Pacchioli ses nov toc en in camiun. L’artist sursilvan che viva dapi intgins onns en Frantscha resista als lockdowns e va tuttina sin turnea cun «Ni Brel ni Barbara».
Questa idea è sa sviluppada il segund di dal lockdown. Nus avain tschertgà ina soluziun co tuttina giugar teater ed avain chattà quest camiun. Uschia essan nus autonoms e savain giugar er senza salas da teater.
Sin viadi èn els cun ina sala da teater mobila che porscha plaz a 90 aspectaturs ed aspectaturas. La turnea cun il camiun ha manà Mario e Laurent e lur toc «Ni Brel ni Barbara» en blers lieus senza chasas da teater. Cultura sin rodas er sper las metropolas da teater. Suenter 40 preschentaziuns turnan Brel, Barbara, Laurent e Mario puspè a chasa en Frantscha, enavos sin las tribunas grondas.
