Creschida si è ella a Donat ed a Cuira. Suenter l’emprendissadi commerzial tar in’advocatura è ella ida en Frantscha, pli tard en l’Engalterra. Sin quest viadi n’ha ella betg mo emprendì novas linguas mabain era remartgà ses interess per il jodlar. In hobi ch'ha blers onns pli tard era laschà emprender d’enconuscher ses um.
Marlena Furger Sali è ida sia atgna via, ha era fatg servetsch militar. Quai dad ina vart or d'in sentiment da conscienziusadad – ses bab n’ha betg pudì far servetsch pervia da problems cun la schanuglia – ma era perquai ch’ella aveva ina tscherta fascinaziun e mirveglias.
Cun 50 onns è ella ida sin la via da Son Giachen, dal sid da la Frantscha fin a Santiago de Compostela, 800 kilometers a pe. Il viandar ha ella pli tard lura era fatg sco professiun. Ella ha lavurà sco guida da viadi sin las Lofotas en il nord da la Norvegia ed en l’Islanda. Gist l’Islanda stat fitg a cor ad ella. Oz posseda ella in’atgna interpresa da viadis e malgrà ch’ella pudess gia giudair la pensiun vul ella cuntinuar cun ils viadis da gruppa. Esser en la natira, quai dettia ad ella la forza ch’ella dovria mintga di, di Marlena Furger Sali.
-
Bild 1 von 4. Tras la naiv cun las gianellas. Dapi entgins onns ha Marlena Furger Sali sia atgna interpresa da viadis Conatur a Berna. Bildquelle: Marlena Furger Sali.
-
Bild 2 von 4. Ella ha era gia manà gruppas tras las Lofotas... Bildquelle: Marlena Furger Sali.
-
Bild 3 von 4. ...u era sin las sendas verdas da l'Islanda. Bildquelle: Marlena Furger Sali.
-
Bild 4 von 4. L'Islanda è sia destinaziun preferida. Quest onn turna ella puspè là cun ses um per viagiar tras il nordvest. Bildquelle: RTR Adrian Camartin.
Ma usche bler temp n’ha ella betg pli. Avant paucas emnas è naschida la beadia Elina. E sco tatta rumantscha ha ella fatg il propiest da discurrer rumantsch cun la poppa da sia figlia. «Quai era sche il rest da la famiglia na chapescha betg adina tut.» di ella cun in surrir.