Marlis Flepp accumpogna, cusseglia e lai raquintar persunas da lur vita, da lur biografia avant ch’igl è forsa memia tard. Ella sa gida er cun persunas ch’èn a la tschertga dal senn da la vita e sa dumondan tge far cun il temp che resta. Plinavant sa gida ella cun reglar las davosas chaussas da la vita.
Libertad è per mai da pudair far quai che mes cor giavischa.
Creschida si è Marlis Flepp a Cumadé, sin in bain puril sisum il runal La Péra a Trun, quai ensemen cun trais frars. Uschia haja ella emprendì gia baud dad esser ferma, da morder e da sa metter atras. Malgrà in runal gist sper chasa è il ballape stà sia gronda passiun. La carriera da ballape ha lura manà Marlis Flepp fin a Bogn Ragaz nua ch’ella ha giugà en la pli auta liga svizra.
Grazia al ballape ha Marlis er emprendì d’enconuscher sia partenaria. Dapi passa dus decennis viva ella ensemen cun ina dunna. Al cumenzament saja quai stà in grond process. Ella haja ditg ponderà sch’ella duai ir quella via encunter il flum. Sia tema da lezzas uras: tge consequenza ha quai per il geniturs. Quest onn vegn Marlis Flepp a maridar sia partenaria, uss che quella schanza è dada.