«Agir cun cor sincer è adina bun»
Viver sapientivamain la vita, chattar senn en la vita, ma surtut far pasch. Far pasch cun auters ma surtut cun sasez per chattar la cuntentientscha. Quai èn cussegls che Marlis Flepp dat a sia clientella che tschertga equiliber e serenezza en fasas difficilas da la vita. Quai pon esser consequenzas d’in divorzi, la perdita da la lavur, ma surtut era situaziuns da cumià e cordoli avant e suenter avair pers ina persuna charezzada. En l'emissiun Vita e cretta ans dat Marlis Flepp cussegls co mintgin e mintgina da nus pudain surmuntar muments en ils quals nus stuain laschar dar e laschar ir ina persuna charezzada per adina.
Bleras giadas aud'jau : «Sche mo jau avess ditg, sche mo jau avess fatg»
Rugar per perdun ed engraziar per il temp communabel, sajan elements che gidan d'acceptar la mort cura che ella prenda davent a nus ina persuna chara. «Il pli impurtant è far pasch, saja quai cun commembers da la famiglia, cun la persuna muribunda, ma surtut cun sasez.» En sia lavur sco cussegliadra da sia agentura «beFrieden» intimescha ella las persunas e prender temp per prender cumià a moda sapientiva da la persuna che sto bandunar noss mund. Ella cusseglia d'acceptar sche ins na chatta adina ils dretgs pleds en ina situaziun cumplitgada.
I dovra tolaranza vicendaivla e quella è qua cura ch'ins agescha cun il cor.
Il svilup che haja surprendì noss stil da viver e la societad, na lubeschian betg pli temp avunda per ans fatschentar cun prender cumià, mort ed il laschar encrescher. Pertge che la dunna da 51 onns ha l'impressiun che la societad haja mess la mort al ur da la vita, ans declera ella en l'emissiun Vita e Cretta.
