Brevs d'amur avevan pli baud ina pli gronda impurtanza che uss. Oz na vegnia betg pli scrit bleras brevs d'amur, quai di il responsabel per las collecziuns dal Museum da communicaziun da Berlin, Dr. Veit Didczuneit. Nua che la correspundenza per brev exista anc oz saja tar la posta militara. La schuldada appreziescha d’avair brevs persunalas en l’unifurma, per exempel durant temps da guerra, enstagl d’in whatsapp sin il telefonin, uschia Dr. Didczuneit.
Brevs d'amur d'avant passa 100 onns
Sutvart pudais Vus leger – e laschar inspirar – d'intginas brevs d'amur dal 19avel ed entschatta dal 20avel tschientaner. Questas brevs sa chattan en la collecziun da brevs d'amur dal museum a Berlin. Per pudair leger meglier la scrittira veglia tudestga, la «Kurrentschrift», datti ina transcripziun da mintga brev en scrittira moderna. Cun in clic sin il paliet da maun dretg pudais Vus avrir mintga brev.
Brevs d'amur ch'han surmuntà cunfins serrads
L'onn 1988 ha la studenta da farmazia Katrin S. da Sebnitz en Saxonia entupà il student Henson S. da Alzenau, datiers da Frankfurt am Main, en il tren da Prag a Dresden/Berlin. La giuvna da 22 onns ed il giuven da 24 onns èn s'inamurads. Henson pudeva mo darar visitar Katrin ed ella, sco burgaisa da la Republica Democratica Tudestga (DDR), na dastgava betg ir en il vest.
Telefonar era fitg char, uschia ch'els avevan be la pussaivladad da scriver brevs. Las brevs cuntinueschan fin il schaner 1989, cura che Katrin ha cumenzà ina nova relaziun, perquai ch'ella na veseva nagin futur per els dus. Quella relaziun n'ha dentant betg funcziunà ed ella ha puspè contactà Henson. Ils 7 da settember 1989 è Katrin lura fugida or da la DDR. Henson ha gidà ella da cumenzar ina nova vita en la BRD.