Il plan da la Nova Fundaziun Origen è da construir a Mulegns ina tur alva, 29 meters auta. Pervia da questa tur è il vitget en il Surses al pe dal Pass da Güglia ozendi enconuschents. Il film da CUNTRASTS «Mulegns raquinta sia istorgia» dat in’egliada sin il passà da Mulegns, sin il temps cura che Mulegns era enconuschent sco fermativa per ils giasts bainstants sin lur viadi en l’Engiadin'ota.
En l'Hotel Post Löwe pernottavan prominents e noblezza, per exempel la princessa Mary, la basata dal retg Charles III, cun ses 25 servientas e servients. Era ils nums da Albert Schweizer, Wilhelm Röntgen e dal president american Grover Cleveland sa chattan en il cudesch da giasts da l'Hotel Post Löwe.
Mulegns è in condensat d’istorgia, per ina che lavura davart dal teater in lieu fitg inspirant.
Gest uschè interessant è era l'istorgia da la villa alva che sa chatta gist sper il Hotel Post Löwe. La villa ha construì Gion Jegher. Sco pastizier è el daventà ritg a Bordeaux. El ha fundà il 1856 in uschenumnà «etablissement». La purschida cumpigliava «fraichissments», patissaria e glatschs. Pli tard è el turnà a Mulegns. El ha laschà construir sia villa in renumà architect da Bordeaux. Na be el, era ils emigrants da lez temp han purtà a Mulegns senn commerzial, progress e daners. Quella giada, durant la Belle Époque, in lieu prosperond cun 150 abitantas ed abitants, oz dumbra il vitg anc 15 persunas.
