Il program dal 2024 è exemplaric per il profil dal museum d'art dal Grischun.
Il credo è numnadamain: pensar davent dal lieu, reflectar il lieu e guardar en il mund. Quai muntia, ch'ins mussia adina puspè artists ed artistas dal Grischun che glischian er en il mund, ch'ins prendia si tematicas che sajan virulentas qua, mussia artistas ed artists internaziunals che sajan stads activas en il Grischun.
Exposiziun tematica
Las exposiziuns tematicas regularas sajan daventadas tradiziun en ils ultims onns, di il curatur dal museum Damian Jurt. Quellas han adina in connex cun la cultura, l'istorgia ubain il preschent dal Grischun. Uschia er quest onn; cun il tema lingua. Il punct da partenza per l'exposiziun «Wie Sprache die Welt erfindet» è il mosaic linguistic vast dal chantun Grischun. Ina rolla impurtanta ha il diari da viadi da Gion Casper Collenberg da Lumbrein dal 18avel tschientaner ch'è emigrà a Mauritius.
Midada da perspectiva
Cun l'exposiziun da Liese Guje vegn quasi midà la perspectiva. Ella vegnia numnadamain savens be menziunada sco «la dunna che ha tessì ils teppis» per il artist renumà Hans Ludwig Kirchner. L'exposiziun metta en il center Liese Guje sco artista.
H.R. Giger
Da l'artist H.R. Giger, ch'è naschì a Cuira, haja il museum d'art ina bella collecziun, di Stephan Kunz. Dentant na vegnia quella betg a vegnir mussada. En l'ierta da l'artist ch'è mort avant 10 onns sajan cumparids documents da sia giuventetgna, surtut negativs da fotografias. L'exposiziun duess mussar il giuven Giger, che na saja anc mai vegnì tematisà uschia. I vegnia er a dar in sguard nunspetgà sin la citad da Cuira, di Stephan Kunz.
H.R. Giger ha fatg qua bain enqual chaussa che mo «insiders» savevan – l'exposiziun vegn a dar in'autra vista sin quel artist.
Tut en tut datti il 2024 da vesair set differentas exposiziuns temporaras e duas exposiziuns fixas da l'atgna collecziun en il museum d'art dal Grischun a Cuira – finadina cun in connex Grischun. E danovamain datti er tar mintga singula exposiziun in podcast per tadlar. Quai saja sviluppà en il rom d'in project da transfurmaziun dal temp da Corona – il museum vegnia a cuntinuar il project cun ils podcasts, di il directur Stephan Kunz.