Gia dapi trais onns fan las duas giuvnas musicistas ensemen musica cul num Jenja. Ellas han era gia dà concerts a nozzas, festas da diplom ubain durant festas dal vitg. Il pass enavant en lur carriera fan ellas ussa cun ina EP. In pitschen album che cuntegn sis atgnas chanzuns. Scrit e cumponì dad ellas e producì en il studio da Flatpeak ensemen cun Marcus Petendi.
Ina maschaida da tuttas colurs
Jasmin e Svenja èn omaduas activas en differents chors e san sunar ghitarra. Jasmin è tiers anc activa en la gugga. Pia differentas influenzas – era dal producent Marcus Petendi che ha gidà al duo da cuntanscher lur finamira da crear in disc cun differents stils.
Uschia sa chatta sin il product final ussa chanzuns cun schlantsch («Tschüss e hallo», «Day by day»), chanzuns ruassaivlas, acusticas («Senza tei», «Acceptanza») sco era chanzuns da pop cun elements surprendents («Enzatgei niev», «Should I»). Co ins vesa en ils titels scrivan ellas lur chanzuns per rumantsch ed englais. Qua han las chantaduras lur preferientschas.
Lur emprima finamira, numnadamain da crear in disc variant è gartegià a las giuvnas chantaduras. La proxima finamira fiss uss da daventar entras quel pli enconuschentas e silsuenter era savair dar concerts pli gronds. In giavisch dad ellas fiss da savair sunar durant la festa da citad da Cuira ubain schizunt a l’Open Air Lumnezia.
