-
Bild 1 von 2. Pli baud veseva la producziun e registraziun anc ora in pau auter. Bildquelle: RTR.
-
Bild 2 von 2. Uschia vesi ozendi ora en il bus da registraziun. Bildquelle: RTR.
Dapi il 1984 ha RTR registrà var 11'000 chanzuns. Bleras da quellas èn stads concerts. Concerts d'orchesters, da chors, da chantaduras, da musicists, da furmaziuns popularas, da solistas ed autras gruppas musicalas. Durant in'emna laschain nus reviver en il radio sis da quels concerts mintgamai las 20.00 uras.
Dumengia, ils 10-11 «La musica classica indigena»
«Musica classica tegnida en tun popular cumponida d'indigens» era il titel d'ina seria d'Artgs musicals dal 2005. En quest'emissiun speziala repetin nus ina part da quella seria cun cumposiziuns da Gion Antoni Derungs, Hannes Meyer, Domenic Janett, Anny Roth-Dalbert, Armin Caduff e Gion Giusep Derungs.
Glindesdi, ils 11-11 «Concert da Breitbild a Cuira»
La sonda dals 9 da november han ils rappers da «Breitbild» festivà lur giubileum da 20 onns. Els han fatg ina mega festa cun 6'000 aspectaturas ed aspectaturs en la Stadthalle a Cuira.
Mardi, ils 12-11 «RTR ed il chant da chors»
En quest'emissiun speziala emettain nus parts d'in concert cun chant viril dal «Coro polifonico di Ruda», registrà ils 25 da matg 2013 a Vella. In concert per il giubileum da 75 onns Chor viril Lumnezia.
Mesemna, ils 13-11 «RTR e la musica instrumentala»
Ils 22 da settember 1995 avain nus registrà a Berna il concert da l'Orchester instrumental da l'Armada Svizra. Vus pudais tadlar sis cumposiziuns ch'èn vegnidas preschentadas en il Kursaal a Berna.
Gievgia, ils 14-11 «RTR e la musica populara»
La Hanneli-Musig ha concertà ils quatter da schaner 2018 a Sent. Nus vulain gugent preschentar anc ina giada a Vus quest concert, moderà da Jachen Prevost cun parts d'intervista cun Ueli Mooser.
Venderdi, ils 15-11 «Hecht a l'Open air Lumnezia 2019»
In areal fullanà è sa preschentà a la gruppa da Lucerna la sonda saira a l'Open air Lumnezia 2019. Ed ils giuvens Stefan Buck, Christoph Schröter, Chris Filter, Philipp Morscher e Daniel Gisler han pudì ademplir las aspectativas dals fans.
RTR Concerts 20:00