«Giusep Giuanin Decurtins ha adina or las antennas. El sa nua ch'i dat tge chors e musicas e sustegn questas. Quai ha ina gronda valita», di il dirigent e pianist Clau Scherrer. Baininqual musicista e musicist ha fatg l'emprima registraziun tar RTR e pli tard fatg carriera.
Giusep Decurtins è insaco ina part da mia uffanza.
Clau Scherrer ha fatg l'emprima registraziun da musica cun RTR sco buobet. El ha sunà clavazzin e las soras han chantà. «Giusep Giuanin era en il bus da registrar e savaiva exact sin il punct, nua ch'i è da midar insatge».
Mario Pacchioli n'aveva betg durmì bain avant l'emprima registraziun da musica. «Jau era gnervus. Per mai era quai sco dad ir l'emprima giada en il studio», di il musicist. Giusep Giuanin haja adina gì ina moda e maniera fetg sincera ed aviarta da cussegliar e sustegnair.
Giusep Giuanin Decurtins ha era fatg las emprimas registraziuns dals Furbazs. Pli tard ha el annuzià els pil Concours d’Eurovision e cunquai dà in grond stausch a lur carriera. «Nus avain d’engraziar fitg bler ad el», di Giusep Quinter.
TSG 17:40