Chant e musica èn materia viva! E gist per Rumantschas e Rumantschs muntan chant e musica identitad. Identitad che creescha cuminanza. Promover, tgirar e collectar questa materia è ina da las incumbensas da RTR. Questa lavur ha sias entschattas curt avant la Segunda Guerra mundiala. Las emprimas registraziuns rumantschas ch’èn da chattar en l’archiv da RTR dateschan da l’onn 1938, l’onn da la votaziun dal rumantsch sco lingua naziunala.
A las entschattas vegnivan las registraziuns anc fatgas dal radio DRS. Quai è lura sa midà il 1984, pia avant 35 onns. En quest onn ha RTR cumenzà a far producziuns da musica. Dapi lura è sa midà bler e l’archiv da las atgnas registraziuns da RTR è creschì fin oz sin passa 11'000 titels.
Concerts e radio live en chasa RTR a la «Sonda lunga»
In’emna pli tard, ils 16 da november, ha lieu a Cuira la «Sonda lunga». Per quest di da e plain cultura avra era la chasa RTR sias portas. Sper in vast program per pitschen e grond emettain nus en il radio 3 giadas 35 minutas cun musica live or da nossa «Sala». Nus dain in sguard enavos sin 35 onns musica rumantscha. I sa preschentan en 3 pitschens concerts mintgamai 3 musicistas e musicists.
Nus vegnin a procurar per vairs highlights! U avessas vus spetgà d’insumma ina giada puspè vesair Elmar Deflorin sin tribuna cun musica dals Hades? U ils Vagabunds Benedetto Vigne e Paulin Nuotclà? Quai èn be dus dals 9 acts extraordinaris che vegnan a sa preschentar live en chasa RTR. Vus pudais visitar las emissiuns, ellas èn publicas.
Ils concerts en survista:
- 16:00 Benedetto Vigne e Paulin Nuotclà, Bulais, Mattiu Defuns
- 18:00 Hades, Passiunai, primaudiziun dal 47avel Top Pop Rumantsch
- 19:00 Corin Curschellas, Tartaruga, Liricas Analas
Primaudiziun 47avel Top Pop Rumantsch
Precis, vus avais legì endretg qua survart, i dat era la primaudiziun d’in nov Top Pop Rumantsch! Per ina nova ediziun avain nus scuvert ina nova e giuvna vusch. Igl è quella da Saskia Demarmels da Salouf. Cun 16 onns è ella la pli giuvna chantadura insumma en l’istorgia da quella seria. Cun ella avain nus producì sia emprima atgna chanzun e per la primaudiziun vegn ella a chantar ella live per noss auditurs ed il public en chasa RTR.
Saira da cumpagnia a Falera
Sonda, ils 9 da november, envidain nus ad in «Artg musical sin visita» en La Fermata a Falera. I spetga in program cun chant e musica, reminiscenzas or da l’archiv e discurs cun persunas che han accumpagnà quest svilup musical e las producziuns da musica ils ultims 35 onns. Per il divertiment musical, era durant la stiva da café, procura la «Kapelle Oberalp».
Program:
- 19:30 portas avertas
- 20:00 bainvegni
- 20:15 act festiv
- 21:15 stiva da café - organisada da la Societad da musica Falera
RTR actualitad 11:15