- L'Italia ha gudagnà il 65avel Eurovision Song Contest. La band da glamrock Måneskin cun sia chanzun «Zitti e buoni» ha survegnì ils pli blers puncts.
- Il represchentant svizzer, Gjon's Tears ha persvas la giuria ed il public cun la chanzun «Tout l'univers» ed è vegnì terz.
- 26 pajais èn passads si sonda saira davant radund 3'500 persunas.
La chanzun dals victurs talians, «Zitti e buoni» è ina chanzun da rock. L'um a la testa da la band, il chantadur Damiano David. Translatà munta il titel «Quiet e pulit». En il text da la band da Roma vai persuenter da betg sa suttametter a convenziuns – mabain dad esser auter ch'ils auters. Perquai che la bassista Victoria vegn dal Danemarc, ha la gruppa tschernì sco num il pled danais per clerglina: Måneskin.
Svizra avess gudagnà tenor giuria
Il Svizzer Gjon's Tears ha pudì sperar enfin la fin sin ina victoria. Suenter che las vuschs da la giuria eran enconuschentas, ha el perfin manà. Las vuschs dal public han lura dentant catapultà l'Italia a la testa e la Frantscha sin plazza dus dal ESC.
Surpassà il success dal 2019
Cun quest plaz, ha Gjon's Tears anc surpassà il success svizzer dal 2019. Là era Luca Hänni vegnì quart cun sia chanzun «She Got Me».
Durant sia preschentaziun, haja Gjon's Tears sur tut pensà vi da tut quels che charezzian el. Ad els haja el vulì far in plaschair e dar ses meglier.
