Men Steiner è oriundamain da Scuol. El e stà magister e redactur tar RTR, ha sunà blers onns tar ils Fränzlis da Tschlin, cun autras furmaziuns ed er sco chantautur. El era in grond amatur da las chanzuns popularas da Men Rauch, e perquai ha el er emprais a sunar la ghitarra.
Meis instrumaint d’eira il prüm la gïa, pür davo n’haja imprais la ghitarra, e quai cul cudesch da Men Rauch «Chanzuns per guitarra»
La fin dals onns 60 era Men Steiner a Turitg per ses studi da magister secundar e pli tard per dar scola. Durant quels onns ha el sunà savens tar inscunters da students en la «Öpfelchammer».
Pli tard era Men Steiner savens sin visita tar ils Bierts ch'abitavan lura er a Cuira. Quai per chantar e sunar la ghitarra – ed el preschentava sias atgnas chanzuns. Aita e Men han lura cumenzà a chantar sco duo.
Lur passiun: las chanzuns popularas rumantschas
«Giodim in quella val», «Il bel Bernard», «Saira per saira», «Il silip e la furmia» e bleras autras.
In dals emprims concerts è stà il 1976 en la Klibühni a Cuira, e quai è er stà l’ultim concert che Aita ha chantà cun ses bab. Dapi quella giada han Aita e Men chantà sco duo e fatg sur 100 concerts – en pitschens ravugls, ma er per festas dal 1. d'avust a la televisiun, a Paris cun ina gruppa da jazz u a Minca en la gronda Sedlmayerhalle en occasiun d'ina festa internaziunala da folclora. Bellas regurdanzas datti er dal festival da folk a Lenzburg en il giardin dal chastè.
Enturn il 1995 ha Men Steiner cumenzà a sunar culs Fränzlis, fin il 2014 – e lura hai dà ina lunga pausa.
La turnea da cumià
Suenter che Aita e Men han fatg chant e musica durant pli che 50 onns, è il temp da sa retrair dal palc arrivà. Perquai han els fatg l’onn passà e quest onn ils ultims concerts da lur turnea da cumià, tranter auter a Zuoz, Segl, Valchava e Sent. Era cun in sguard enavos e blera nostalgia.
Men e la rescuverta dals Fränzlis
Il 1982 vegn registrà il disc «Aita Biert, Men Steiner ed ils Fränzlis da Tschlin: Chanzuns. Lieder und Tänze aus dem Engadin». Sin quest disc vegnan els accumpagnads dals Fränzlis – lezza giada cun Domenic, Duri e Curdin Janett, Flurin Caviezel ed Arnold Alder.
Da quest project unic per la registraziun è naschida ina furmaziun che ha fatg carriera, ina gronda carriera, ils «Fränzlis nouvs». Dad uss davent, cun Men Steiner a la gìa ed ils auters da la furmaziun da la platta dal 1982. Uschia ha cumenzà il viadi dals «Fränzlis da Tschlin» tras tut la Svizra ed en differents stils. Il commember da fundaziun Men Steiner è sa retratg il 2014.