Siglir tar il cuntegn

Header

Video
Semino Rossi chanta per RTR
Or da RTR Social dals 27.08.2019.
laschar ir
cuntegn

Albumcheck Semino Rossi - So ist das Leben

Mo darar sa sviluppescha il curs da la vita sco quai ch’ins giavischa. Er la via da Semino Rossi ha giu auts e bass fin tar la via da success nua ch’el sa chatta oz. Ses album nov ha num «So ist das Leben», lain mirar sche las chanzuns descrivan propi sia vita.

Semino Rossi è naschì l’onn 1962 a Rosario en Argentina. L’onn 1985 è il giuvenot da 23 onns sesì en l’aviun cun l’intenziun da sgular en Spagna e da là anora cumenzar cun ina carriera da musicist. Bunamain 15 onns è el stà in musicist da via. Pir l’onn 2004 è cumparì ses album da debut «Alles aus Liebe» e dapi quai di maina la via da success da Semino Rossi mo pli ensi.

Albumcheck tar l'album nov da Semino Rossi «So ist das Leben»
Legenda: Albumcheck da «So ist das Leben»: il parairi da Christa Soliva RTR

«So ist das Leben» part per part

El descriva en ses album il curs da la vita; in permanent si e giu. Da bels mo era da grevs muments, da cletg ed amur mo er da dolur e dischillusiun. Pertge tut è collià in cun l’auter. In exempel è la single «Das verflixte 7. Jahr» che descriva differentas fasas d’ina relaziun e che finescha cun in messadi plain speranza. Plain speranza e fitg positiva è era la chanzun d’amur «Alles Gute kommt von Dir». Tar «Arriba, arriba», «So ist das Leben» e tar la proxima single «Hola, hola – Hast du heute Abend Zeit für mich» sentan ins propi il plaschair da viver ed il cletg perfetg.

Ils tocs da «So ist das Leben» en survista

Ils tocs da «So ist das Leben» en survista
  1. Hola, hola - Hast du heute Abend Zeit für mich
  2. Arriba, Arriba!
  3. Du und ich
  4. Das verflixte 7. Jahr
  5. Unbeschreiblich weiblich - Umständlich männlich
  6. Un dia nos volveremos a ver
  7. Nur du
  8. So ist das Leben
  9. Alles Gute kommt von dir
  10. Jeder Tag ist wie ein Abenteuer
  11. Y quedate conmigo
  12. Mütter sind die wahren Engel

Cun la ballada spagnola «Un dia nos volveremos a ver» mussa il chantadur da l'Argentina era ina vart pli pensiva e melanconica. Quai cover da la chanzun «Amoi seg' ma uns wieder» d'Andreas Gabalier è deditgà al bab da Semino Rossi ch'è mort avant plirs onns.

Video
Sumsar cun Semino Rossi
Or da RTR Social dals 26.08.2019.
laschar ir

Dal romanticher tar il star da schlagher

La chanzun ch'è deditgada a ses bab è dentant la suletta chanzun cun in sguard en il passà. L'album na raquinta betg istorgias dal curs da vita da Semino Rossi mabain mussa nua che la carriera maina el en il futur. Numnadamain en direcziun schlagher pop - ina varianta pli moderna dal schlagher. Pia in pau davent dal tipic chantadur da chanzunettas dultschas (schnulzas). In pass nunspetgà, dentant necessari per tegnair pass en il mund dal schlagher modern.