Siglir tar il cuntegn

Header

cuntegn

Bobby McFerrin Ina vusch e tschients tuns

L’artist american da chant Bobby McFerrin ch’è daventà famus cun ses hit «Don’t Worry Be Happy» vegn 70.

Ils pli blers enconuschan el sulettamain pervia da ses grond hit «Don’t Worry Be Happy». Ina chanzun inspirada dal guru indic Meher Baba, ed interpretada be cun tuns che Bobby McFerrin fa cun sia vusch e ses corp. Quai è numnadamain il grond talent da l’artist american.

El è in acrobat da vusch – e lascha tunar sia vusch u sco ina violina dentant era sco in bass u in posauna e mida levamain tranter sia vusch dal pèz e quella da falset. Cun sblatschar, stumplar cun la detta u dar durant chantar sin ses pèz creescha el entiras chanzuns.

In talent multifar

Ses plaz preferì sco uffant n’è betg stà la plazza da gieus u la sablunera mabain sut il clavazin da ses bab Robert – in chantadur d’operas e l’emprim afroamerican che ha dastgà chantar en la famusa «Metropolitan Opera» a New York. Sia mamma Sara è stada sopranista e professura da chant. Uschia ch’ins pudess dir che Bobby McFerrin ha la musica en ses sang.

Sper sia tecnica unica da chant ha el emprendì da sunar clavazin, clarinetta e flauta. El na vul era betg sa fixar sin in gener musical e sa mova tranter pop, musica classica, jazz ed avantgarda. Tut questa savida musicala dat el gugent enavant u en furma da chanzuns ch’el cumpona sez, u sco dirigent da musicas e chors ubain era sco docent da musica en diversas scolas autas.

Ils albums da Bobby McFerrin

Textbox aufklappenTextbox zuklappen
Purtret da Bobby McFerrin
Legenda:Keystone
  • 1984 The Voice
  • 1987 Spontaneous Inventions
  • 1988 Simple Pleasures
  • 1990 Medicine Music
  • 1992 Hush
  • 2004 Konzert für Europa – The Schönbrunn Concert

RTR program 10:00