Sa regurdais anc dal di da la musica svizra? Quella giada avain nus ed SRF preschentà l'entir di musica svizra. Là han quels da SRF er scuvrì la giuvna chantadura «Kings». Ella ha 24 onns, sa numna per propi Anja Gmür ed è oriundamain dal chantun Sviz. Malgrà ch'ella fa gia daditg musica n'è ella betg anc enconuschenta en Svizra.
Ina porta sa serra – in'autra s'avra
Gia cun 13 onns è Anja Gmür sa participada a l'emissiun «MusicStar» nua ch'ella n'ha betg cuntanschì la segunda runda, pli probabel pervia da sia vegliadetgna. Tenor il giuror Gölä saja ella bain anc stada memia giuvna per il travasch dal mund da la musica, haja dentant ina vusch excellenta. Paucs onns pli tard il medem maletg: Anja Gmür chanta avant ina giuria, quella giada tar «The Voice of Switzerland», ma na cuntanscha betg la segunda runda.
Anja è anc memia giuvna per il travasch dal mund da la musica, ma sia vusch è excellenta!
Uss abitescha ella dapi trais onns a Londra ed ha là s'annunzià tar la plattafurma «BBC Music Introducing», ina plattafurma sumeglianta ad Mx3 en Svizra, dentant cun ina pli gronda derasaziun. Si'emprima single «Colour» è uss vegnida preschentada en il radio da la BBC. Cun quai ha «Kings» la schanza da pudair sa participar ad in dals festivals sustegnids da la BBC ed uschia era daventar enconuschenta sin il palc internaziunal.
RR Famus & glorius 10:30