Siglir tar il cuntegn

Header

audio
Nov album da Lady Gaga
laschar ir. Durada: 03:56 minutas.
cuntegn

«Chromatica» da Lady Gaga L'album da pop dal 2020?

Ses sisavel album duai oravant tut far plaschair e laschar sautar. Las 13 chanzuns plain energia raquintan dentant tranter auter era da depressiuns, dolurs e da sia relaziun ambivalenta cun ses renum. Èsi perquai l’album da pop il pli cumplet dal 2020?

En la teoria da las colurs stat la cromatica per insatge da pliras colurs – tar la musica è cromatica nianzas da tscherts tuns. Quai è era il motto da l’album «Chromatica» da Lady Gaga, plain colur cun chanzuns fitg preschentas, plain energia che fan sautar. Suenter stops el jazz, artpop ed el country è ella uss puspè turnada tar il pop e dance. Ed en mintga chanzun da «Chromatica» èsi da chattar in’autra nianza da quest gener.

Purtret da Lady Gaga.
Legenda: Lady Gaga preschenta ses nov album «Chromatica» Keystone

Melodias allegras – messadis profunds

Il fil cotschen da l’album è cleramain la musica da sautar ed ils beats che regordan per part vid ils house-djs dils onns 90. Lady Gaga pachetescha en quest mantè musical dentant messadis profunds. En «Alice», l’emprima chanzun da l’album, elavura ella las depressiuns che han accumpagnà ella ils ultims onns e co ella ha tschertgà la pasch en in pajais magic sco la figura da paraulas Alice. «Plastic Doll» tracta l’emancipaziun e crititgescha quant blera paisa ch’i vegn dà ad exteriuradads. Era auters temas chattan la via en quest album: Acceptanza ed egualitad «Love Me Right», relaziuns e chapientscha vicendaivla «1000 Doves» ni era co musica sa medegiar «Sine From Above».

Trais collavuraziuns

«Sine From Above» è ina collavuraziun cun Elton John che Lady Gaga ha gia descrit sco ses mentur. Sco secunda single ha ella publitgà la collavuraziun cun Ariana Grande «Rain On Me» che ha en ils Stadis Unids ed en la Gronda Britannia cuntanschì directamain l’emprim plaz da las paradas da hits. La gruppa dal K-Pop «Blackpink» cumplettescha il trio da las collavuraziuns cun «Sour Candy». La chanzun che sa differenziescha il pli fitg dal rest da l'album.

Ils albums da studio da Lady Gaga

Textbox aufklappenTextbox zuklappen
Ils albums da studio da Lady Gaga
  • 2008 – «The Fame»
  • 2011 – «Born This Way»
  • 2013 – «Artpop»
  • 2014 – «Cheeck To Cheek»
  • 2016 – «Joanne»
  • 2020 – «Chromatica»

Cumplet, grond, profund – ma...

Dapi che Lady Gaga è sa preschentada il 2008 cun ses album da debut «The Fame» ha ella influenzà la musica da pop e vala sco icona dal 21avel tschientaner da quest gener. Cun ils albums «Artpop», «Cheek To Cheek» e «Joanne» sco era cun sia ballada «Shallow» da «A Star Is Born» ha ella mussà sias diversas fassettas. En «Chromatica» che vegn tenor mai tschert ad esser in dals megliers albums da pop dil 2020 vegnan quellas fassettas, sia vusch e ses messadis profunds inundai en ina lavina da beats e melodias da saut. Ella vul oravant tut far plaschair e prender per in mument ils quitads als auditurs – tge ch’è durant il temp da pandemia e crisas franc ina buna chaussa. I renda dentant era da tadlar sut quels synthesizers, bass ed effects electronics.

Artitgels legids il pli savens

Scrollar a sanestra Scrollar a dretga