Siglir tar il cuntegn

Header

cuntegn

Actualitad musica È Giganto daventà in Softie?

Avais Vus gia tadlà in album da Hip Hop che cumenza cun ina chantadura da Soul e finescha cun Patrick Swayze? Na? Lura stuais Vus en mintga cas tadlar il disc nov dal rapper grischun Giganto.

La scena da rap rumantscha è plitost survesaivla. Qua èn sa chapescha las Liricas Analas e lur commembers che han era gia fatg projects da solo e collavuraziun. Lura Snook da l'Engiadina e Sirius, in plitost nov en la scena. Betg d'emblidar è dentant Giganto. Il giuven da 25 onns da Rabius ha uss publitgà ses terz album. Gia cun «G-punct» ch'è cumparì il 2013 ha el fatg gizzar las ureglias ed il pli tard cun sia collavuraziun cun Mattiu Defuns tar «Undas» ha el definitivamain prendì plaz en la scena da hip hop.

Revista dal album Sault d'amur da Giganto
Legenda: Albumcheck dad «Sault d'amur»: il parairi da Dominic Pohle RTR

Atras il «Sault d'amur»

L'emprim patratg tar il titel «Sault d'amur»: In'entir album cun il tema amur – è il Giganto daventà in «softie»? La resposta sin quella dumonda: Gea, na e forsa. Gea sin l'album èsi da chattar chanzuns d'amur sco per exempel «Ina» ni era la collavuraziun cun Lou Zarra «Brown Eyes». Era mal il cor ha dumagnà en la tracklist cun il toc «Senza tei».

Ils tocs da «Sault d'amur» en survista

Avrir la box Serrar la box
  1. Intro
  2. Steilas
  3. Vibraziun
  4. Baby
  5. Mazzament d'amur feat. Mattiu Defuns
  6. Brown Eyes feat. Lou Zarra
  7. Tgil blut
  8. Boogie Woogie
  9. Nair feat. Orange (Liricas Analas)
  10. Senza tei
  11. Ina
  12. First Love feat. Sirius
  13. Pren ella
  14. 1 minuta feat. Jusht (Liricas Analas)
  15. Outro

Na propi in softie è Giganto tuttina betg daventà. Pertge cun las chanzuns «Boogie Woogie» ni «Pren ella» sa fatschenta el era cun auters aspects da l'amur e lai sentir pli fitg il «Gangster».

Sample tge?

Avrir la box Serrar la box

In sample è ina part ord ina chanzun gia finida. Quai po esser mo in tun u ina ramur ma era in'entira passascha. In exempel giud l'album è la chanzun 1 minuta. Quella cumenza cun ina part enconuschenta da la seria da televisiun «Baywatch».

Mo forsa in pauet pli ruassaivel è Giganto tuttina daventà. Sper divers samples da classichers dal hip hop ha el numnadamain er elements ord tocs da Dido (Vibraziun) u Patrick Swayze (Outro). Ma ils samples n'èn betg il sulet che lai parair l'album pli fins e ponderà. Pertge sin «Sault d'amur» audan ins sper synthesizers dals onns 80 er adina puspè instruments a flad e da cordas. Ina maschaida che fa l'album variant e divertent e che lai guardar sur ina u l'autra finezza che manca anc en ils texts. Tschintg stailas per quai album variant che porta puspè nov schlantsch en la scena dal hip hop rumantsch.

Ulteriurs parairis tar l'album...

video
Oldies vs. Giganto
Or da Battaporta dals 08.02.2019.
laschar ir. Durada: 3 minutas 33 Secundas.

Artitgels legids il pli savens