Siglir tar il cuntegn

Header

Purtret da Gjon's Tears
Legenda: Va per la Svizra a l'ESC 2020: «Gjon's Tears». SRF, Lukas Maeder
cuntegn

Eurovision Song Contest «Gjon's Tears» represchenta la Svizra a Rotterdam

Cun la chanzun «Répondez-moi» vegn il chantadur «Gjon’s Tears» a represchentar la Svizra a l’ESC 2020 a Rotterdam en ils Pajais Bass.

Gia sco uffant era la musica la gronda passiun dal giuven da 21 onns Gjon Muharremaj. Creschì si a Broc en il chantun Friburg ha el l’entschatta oravant tut chantà per sia famiglia che deriva da l'Albania e dal Cosovo. Ses tat saja ses pli grond fan ed haja perquai era annunzià ses biadi il 2011 per in’emissiun da casting en l’Albania.

Il buob ch’era lura pir 12 onns ha cuntanschì il terz plaz. Motivà entras quai è el lura be in onn pli tard sa participà al pendant svizzer «Die grössten schweizer Talente» ed ha là cuntanschì ils mezfinals – il medem resultat sco il 2019 en televisiun franzosa tar «The Voice France». Sper sa participar ad emissiuns da casting ha el studegià chant ed ha là emprendì a jodlar, chant classic, indic e chinais.

Saja quai plaschair, tristezza u melanconia – cun mia musica less jau tutgar ils auditurs en tuttas modas imaginablas.
Autur: Gjon's Tears

Respunda mai – Répondez-moi

Sia chanzun per l’ESC 2020 ha Gjon’s Tears scrit durant il camp svizzer da chantauturs e chantauturas. Igl è ina chanzun mistica ed intensiva che cumbinescha sia vusch cun chors, artgists e ritmus moderns. Il text raquinta da la derivanza, da la patria e da la tschertga da respostas. Chaussas che han influenzà fermamain il giuven. Per carstgauns cun ina biografia da migraziun saja quai dumondas essenzialas, di il chantautur sez. El è naschì e creschì si en Svizra e vul quest onn represchentar sia patria a Rotterdam durant «l’Eurovision Song Contest 2020».

L’ESC è il pli grond event da musica ch’i dat – esser part da quai munta per in artist enorm bler. Tut tenor il motto da quest onn «Open up – s’avrir» sa lasch jau en sin quell’aventura unica e ma legrel sin tut quai che vegn.
Autur: Gjon's Tears

RTR novitads 15:00