Siglir tar il cuntegn

Header

audio
Il segund festival da la chanzun rumantscha
laschar ir. Durada: 05:21 minutas.
cuntegn

Festival chanzun rumantscha Il segund festival da la chanzun rumantscha è en Engiadina

L’inscunter da chant e musica en onur a la chanzun rumantscha è la stad 2022 a Zuoz (1. - 3 da fanadur). En il center è il chant rumantsch, en spezial il chant ladin, cun sias ritgas furmas e spartas sco chant da cor, chant da cumpagnia, chant d’uffants e chant en famiglia, chantauturs, pop e rock.

La concurrenza da cumposiziuns

Ina part essenziala dal festival è da promover cumposiziuns novas per chors. Perquai envida il festival da la chanzun rumantscha cumponistas e cumponists da crear cumposiziuns per enritgir la purschida per chors. Quellas vegnan valitadas d’ina giuria professiunala e preschentadas durant il festival. La decisiun è lura tar il public che tscherna sias chanzuns favuritas da mintga categoria. Las cumposiziuns pon vegnir inoltradas a partir da l’enviern proxim. Ina communicaziun precisa cun il proceder e cun termins segua l’atun.

Ina finamira impurtanta dal festival è er da realisar spazis per inscunters cun chant e musica, e star da cumpagnia e chantar. «Chi nun ama la chanzun ha l'orma naira sco'l charbun», quai aveva ditg il poet e chantadur Men Rauch da Scuol. Perquai duai vegnir chantà en tut las furmaziuns pussaivlas ubain ch’ins giauda las represchentaziuns.

La vischnanca da Zuoz

Zuoz è situà sin 1750 meters sur mar, ha 1275 abitantas ed abitants, ed è in lieu che porscha tenor ils organisaturs relaziuns idealas per il festival - i saja ina vischnanca cun gronda tradiziun e cultura rumantscha, cumpacta cun buna infrastructura, cun giassas e plazzas ed in bel ambient. Gia l’onn passà, tar il giubileum da 100 onns da la Lia Rumantscha, aveva dà in eveniment cun ina bella atmosfera.

Artitgels legids il pli savens

Scrollar a sanestra Scrollar a dretga