Siglir tar il cuntegn

Header

cuntegn

Festivals L'Open Air Lumnezia na sa anc betg co vinavant

Oz han blers guardà vers Berna a la conferenza da medias dal Cussegl federal. Segir era ils responsabels dals festivals. Per lezs n'hai oz dentant anc betg dà respostas.

Suenter che la Germania ha stritgà tuttas occurrenzas grondas fin la fin d’avust han ins era en Svizra quintà cun il mender cas. Cusseglier federal Berset è dentant mo s’exprimì minimal pertutgant occurrenzas grondas ed ha renvià vers pli tard. Per Alain Berset èsi cler: Eveniments gronds – sajan quai festivals ubain era occurrenzas da sport – ston spetgar il pli ditg enfin ch'els pon puspè avair lieu. Las mesiras da tegnair distanza e reducir contacts cuntinueschian numnadamain.

Per planisaziun da l'OAL vegni stretg

Era il schef dal Open Air Lumnezia, Norbert Cavegn ha spetgà sin ina resposta da Berna. Nus avain tschentà ad el las trais pli impurtantas dumondas:

RTR: Tge muntada ha quella decisiun uss per Vus?

Norbert Cavegn: Nus na savain betg propi vid tge che nus essan. Nus avain sperà ch'i dettia oz ina decisiun ch'i din cler fin lura datti eveniments gronds u betg. Ussa stuain nus simplamain anc spetgar giu. Nus avain detg gia avant la sesida dad oz giu Berna, che nus stettian stand-by fin circa mez matg. Uss è tut avert, sch'i dat quest onn l'Open Air Lumnezia u betg.

Quant impurtant fiss ina decisiun concreta stada?

Nus avessan pudì planisar in zic auter, nus avessan savì vid tge che nus essan. Quai è adina uschè ina chaussa. Uss essan nus vid discussiunar er cun furniturs e cun las bands ed ils managements. Tut è malsegir. I vegn dumondas ed ins na sa betg propi vida tge ch'ins è. Uss èn ins in zic tranter sutgas e bancs. Ma questa decisiun respectain nus e tge decisiun er adina che vegn da Berna, nus stain davos quai.

Cura sin il pli tard stuais Vus savair sche l'Open Air Lumnezia dastga avair lieu?

Per nus fiss bun da savair fin circa mez matg. Pertge lura avain nus anc la pussaivladad da finir giu e discussiunar a fin ils contracts che nus na pudain betg tegnair en pervi dal virus. Quai dess a nus avunda temp da far quai schuber ed endretg.

Emprims festivals èn vegnids stritgads

Suenter la conferenza da medias dal Cussegl federal èn il «Paléo Festival» (Nyon), il «Blue Balls Festival» (Lucerna), il «Montreux Jazz Festival», il «Rock the Ring» (Hinwil) ed il «Argovia fäscht» vegnids stritgads u spustads. Tar festivals che avessan lieu il zercladur sco per exempel il «Greenfield festival» u er l’Open Air Sogn Gagl èn anc adina malsegirs e spetgan sin ina decisiun sperta.

RTR actualitad 08:00