Siglir tar il cuntegn

Header

audio
Tgi pomai è Beethoven?
Or da Actualitad dals 14.12.2020.
laschar ir. Durada: 04:11 minutas.
cuntegn

Giubileum da 250 onns Beethoven – il cumponist surd, ma revoluziunar

Che Beethoven n’è betg mo il chaun en il film «Ein Hund namens Beethoven», mabain in cumponist da musica classica sa quasi in e scadin. Ma, pertge è el uschè enconuschent e pertge fa il mund quest onn in hantieri pervi dad el? In purtret.

Pompus, colossal u epocal – cun tals chavazzins pon ins descriver la musica da Ludwig van Beethoven (1770-1827), il cumponist da la musica classica. Gia d’uffant valeva el sco uffant genial. Ses emprims concerts ha el dà cun 8 onns. Cun 12 ha el scrit sias emprimas cumposiziuns. Naschì è Beethoven a Bonn, ma sia vita creschida ha el cunzunt passentà a Vienna – la chapitala da la musica classica – nua ch’el è er mort.

Il cumponist independent

Ses paun dal mintgadi ha el gudagnà a Vienna sco scolast da clavazin, cun dar concerts e cun cumponer. El è er vegnì sustegnì da mecens, quels n’han però gì nagina influenza sin sias cumposiziuns. Beethoven ha adina cumponì co e tge ch’el ha vulì – e betg sin empustaziun.

Tegnai en egl quel um. In di vegn el a dar da discurrer.
Autur: Wolfgang Amadeus Mozartcumponist (1756-1791)

Il cumponist da sinfonias

Il collega cumponist Mozart, ch’ha vivì pauc avant, ha profetisà il success da Beethoven, cura che lez aveva be 17 onns. Furora ha Beethoven cunzunt fatg cun sias 9 sinfonias. El ha sviluppà vinavant quel gener. Mintga sinfonia da Beethoven è in’ovra d’art monumentala ch’ins na po strusch cumparegliar cun sinfonias ch’auters han cumponì avant. Sias ovras èn uschè extendidas ed elavuradas che generaziuns da cumponists suenter el na sa sentivan per part betg abels da cumponer sinfonias. En mintga cas ha Beethoven lantschà grondas discussiuns cun sias ovras.

La novavla sinfonia è segir la speziala, perquai ch'en quella ha el integrà in chor. Tochen lura n’aveva ina sinfonia nagin text e nagin cuntegn. Quai ha Beethoven midà, er gia en sias autras sinfonias (p. ex. Eroica). Sia finamira eri d’exprimer ina idea cun sia musica. En la novavla è quai la fraternitad da tuts umans sin il mund.

Il cumponist surd

Beethoven ha gì grondas difficultads cun sia udida. El aveva in tinitus, n’udeva betg main ils tuns auts ed er il discurrer è daventà ina pli e pli gronda sfida per el. En il decurs da sia vita è sia udida vegnida adina mendra. Cumenzà ha tut en la vegliadetgna da gnanc 30 onns. Tuttina ha el cumponì vinavant enfin a sia mort, pia anc passa 25 onns. Cunquai ch’el aveva da giuven ina excellenta udida, ha el cura ch’el era surd pudì imaginar, co sias cumposiziuns tunan.

Enturn Beethoven datti numerus mitus. Tenor la scienza n’è el betg stà uschè in nausch sco quai ch'il maletg general mussa. Er betg en sia vita privata. El valeva sco «Rheinische Frohnatur» ed ha er gì pliras marusas. Sch’el ha propi fiers ovs sin sia chasarina – sco quai ch’i vegn ditg – na pon ins oz betg pli sclerir. Durant ses temp da vita è el stà in star. Quai mussa er la gronda participaziun a ses til da funeral: fin a 20’000 persunas han rendì al cumponist la davosa onur.

video
La vita da Ludwig van Beethoven
Or da RTR Social dals 17.12.2020.
laschar ir

RTR actualitad 07:00

Artitgels legids il pli savens

Scrollar a sanestra Scrollar a dretga