Siglir tar il cuntegn

Header

cuntegn

Hits da Nadal Original ubain cover

Tschertas chanzuns turnan adina puspè da Nadal. Quai era perquai che autras artistas ed artists vulan profitar dal renum cun producir in’atgna versiun da cover.

Wham – «Last Christmas»

Questa chanzun ha George Michael scrit e publitgà 1984. Dapi lura hai dà 367 covers da quest hit. Il success da l’original ha dentant nagin savì cuntanscher. I va la currella che la chanzun saja atgnamain stà planisà sco «Last Easter» pia l’ultim Pasca – quai n’è dentant mai confermà.

Eartha Kitt – «Santa Baby»

I è ina da las paucas chanzuns da Nadal ch’è vegnì scrit d’ina dunna. Joan Javits ha cumponì quella versiun 1953 che Eartha Kitt ha interpretà. Sper la versiun originala ha Kitt gist sez registrà differentas versiuns da l’original. Era stars sco per exempel Kylie Minogue, Taylor Swift ni ils Pussycat Dolls han gia creà atgnas versiuns.

Dean Martin - «Let it Snow»

Sco «Jingle Bells» n’ha tracta era «Let It Snow» betg explicitamain Nadal. Tuttina è la chanzun dal 1945 ina da las pli enconuschentas ed era ina da las chanzuns da Nadal ch’è vegnida emessa il pli savens. La pli enconuschenta versiun da cover ha Dean Martin publitgà il 1959. Bun 30 onns pli tard è quella chanzun puspè turnada en ils radios e las paradas da hits. En il film «Stirb Langsam» dal 1988 cun Bruce Willis han ins numnadamain udì pliras giadas quest hit.

Artitgels legids il pli savens