Kenny Rogers, in dals gronds stars da la musica da country dals Stadis Unids, è mort ier a Sandy Springs/Georgia. Il musicist, cumponist ed actur, naschì ils 21 d’avust 1938 a Houston/Texas, era in dals gronds protagonists da la scena da country. Sia carriera ha cumenza la fin dals onns 50 e fin il 2018 è el stà en il studio e sin il palc. Lura è el sa retratg per motivs da sanadad.
Hits da country che han plaschì ad in grond public
Rogers ha registrà 39 discs e numerusas singles, ha vendì sur 100 milliuns portatuns ed è stà cun 30 da sias chanzuns sin l’emprima plazza da las paradas da hit, er en quellas da pop. Ses semperverds ils pli enconuschents èn savens chanzuns d’amur sco «Lucille» e «Lady», da l’autra vart aveva el ina flaivlezza per temas socials ch’el ha tractà en sias chanzuns «The Gambler» ubain «Coward of the County».
Ils duets da Kenny Rogers
Divers da ses gronds hits èn duets. El ha chantà «We've Got Tonight» cun Sheena Easton, «Don't Fall in Love with a Dreamer» cun Kim Carnes e ses pli grond success è sta il duet nunemblidaivel cun Dolly Parton, «Islands in the Stream», ina cumposiziun dals Bee Gees. La ballada è stada nr, 1 en blers pajais ed è anc adina in grond semperverd.
