Siglir tar il cuntegn

Header

audio
Pil 70avel da Peter Gabriel
Or da Famus e glorius dals 12.02.2020.
laschar ir. Durada: 02:44 minutas.
cuntegn

Peter Gabriel L'um plain fassettas ha 70

Cun 17 onns fundar ina band, daventar famus en l’entir mund e bandunar quella cun 25 onns per repeter quai anc ina giada sco artist da solo – circa uschia san ins curt descriver la carriera musicala da Peter Gabriel.

Cumparegliaziun dals maletgs

Stuschar reglader a sanestra Stuschar reglader a dretga
Legenda:Peter Gabriel 1975 e 2010Avessas vus oz anc enconuschì Peter Gabriel?

Il bab è stà electroinschigner, la mamma musicista – duas chaussas che han senza dubi influenzà il giuven Peter Gabriel. Dal bab ha el ertà l’interess vid l’electronica e la mamma ha gia baud mussà ad el da sunar la clarinetta. Forsa era pervia da quai ha l’Englais ch’è naschì 1950 a Chobham tschernì la via sco musicist. Ina via che ha per propi cumenzà cun 17 onns cura ch’el ha fundà la band Genesis ensemen cun Tony Banks, Mike Rutherford, Christ Steward ed Anthony Phillips. Els èn stads pioniers da la musica da rock progressiv ed han fatg chanzuns cun melodias cumplexas e divers instruments. Chanzuns che han per part cuzzà var quart d’ura sco per exempel «Supper’s Ready» dal 1972 che cuzza bun 23 minutas.

Hits da Genesis

Textbox aufklappenTextbox zuklappen
Hits da Genesis
Legenda:Reuters

Cun Peter Gabriel:

  • Supper’s Ready
  • I Know What I Like
  • Dancing With The Moonlit Knight
  • Firth Of Fifth

Senza Peter Gabriel:

  • Invisible Touch
  • Land of Confusion
  • I Can’t Dance
  • That’s All

La carriera da solo

Gia otg onns pli tard ha la band gì grond success, era internaziunal, ed han schizunt savì far ina turnea mundiala. A la fin da quella ha Peter Gabriel bandunà la gruppa. Ils motivs èn stads la greva naschientscha da sia figlia e discordia entaifer la band pertutgant il stil da lur musica. Durant che la band è glischnada pli e pli fitg en il mainstream ha Gabriel vulì suandar la via dal rock progressiv ed experimentar enavant cun differents geners.

Insaquants hits da Peter Gabriel

Textbox aufklappenTextbox zuklappen
Insaquants hits da Peter Gabriel
  • Solsbury Hill (1977)
  • Games Without Frontiers (1980)
  • Biko (1980)
  • Sledgehammer (1986)
  • In Your Eyes (1989)

Ses success

Ses emprim success sco artist da solo ha Gabriel lura gì 1977 cun «Solsbury Hill». Cun quella chanzun ha Gabriel tranter auter elavurà la separaziun da Genesis. Enfin 1986 ha el publitgà tschintg albums (Perquai ch’el n’ha betg vulì dar in titel a ses emprims quatter albums èn quels vegnids battegiads inuffizialmain «Car», «Scratch», «Melt» e «Security»). L’album «So» ha dentant surpassà tut tschels albums. Tranter auter chattan ins sin quest album ses grond hit «Sledgehammer» che ha tenor l’artist be gì tant success pervia dal video innovativ. Quel è fin oz il video emess il pli savens insumma tar MTV ed ha gudagnà 9 MTV Music Awards tge ch’è medemamain record.

Engaschament umanitar ed auters projects

Musicalmain è Peter Gabriel fin oz activ. Tranter auter ha el accumpagnà l’onn 2000 la Millenium Show a Londra e 2006 ha el mess ensemen la musica per il campiunadi mundial da ballape. Gia pli baud ha el fundà ses agen label «Real World Records». L’emprima publicaziun da quest label è stà la musica «Passion» per il film «Die letzte Versuchung Christi». Tenor critichers saja quai stà il punct culminant da Gabriel tge che pertutga la musica mundiala. Sper la musica è il chantadur s’engaschà per ils dretgs umans cun sustegnair «Amnesty International», cun si’atgna organisaziun «Witness» e cun concerts da beneficenza. Simbolicamain per quest engaschi stat la chanzun «Biko» dal 1979. In chanzun da protest encunter l’apartheid.

RTR actualitad 09:00

Artitgels legids il pli savens

Scrollar a sanestra Scrollar a dretga