Neil Young ha oz 75, ed il musicist canadais cumpara er sin in disc ch'è gist vegnì publitgà, quel dals Galiots. In da ses tocs «Cinnamon Girl» ha survegnì in text rumantsch e sa numna uss «Camel». Er auters enconuschents èn arrivads sin «Crappa da fiug», uschè er chanzuns da Mark Knopfler, John Hiatt e Deep Purple en in nov vestgi e per rumantsch.
Ils agens tocs dals Galiots
7 da las chanzuns èn lur atgnas, cumponidas da Flavio Huonder ed arranschadas dals Galiots. E spert enconusch’ins lur rock grugl ed indestruibel che regorda al sound dals onns 70. E lur chanzuns raquintan er savens bellas istorgias, sco quella da «Paul Luziet», in tip singular ed original ch'ha in secret.
Ni era «Rockerverc» che sa basa sin «Georgia Rae» da John Hiatt. Quai è in sguard enavos sin las primas experientschas cul rock’n’roll, tadlar la dumengia saira la parada da hits e lura pli tard cumprar las emprimas plattas. Il cumenzament d’ina gronda amur per la musica.
Ils Galiots
La band datti dapi il 2002, e la furmaziun actuala sa cumpona da Flavio Huonder (ghitarra e cant), Corsin Stecher (ghitarra, bass), Josef Sgier (bass, ghitarra), Fabian Huonder (chant, tastas) e Francisco Gonzalez (battaria).
Discografia dals Galiots
2015 Crappa & Greppa, disc dubel cun 24 chanzuns
2020 Crappa da fiug, cun 14 chanzuns