Bob Dylan è in dals musicists, cumponists e poets che han influenzà fermamain la musica da pop e rock. Cun 79 onns preschenta el a la fin puspè atgnas chanzuns, 8 onns suenter il disc remartgabel «Tempest». Dapi là ha el fatg divers discs cun chanzuns veglias americanas, surtut cun tuns da jazz, swing, country e blues. Uss turna el cun in’ovra che integrescha blers stils da musica, da blues fin r’n’b e da rock’n’roll fin gospel, quella musica ch'è adina puspè stada actuala durant sia lunga carriera.
«Rough And Rowdy Ways» - vias gruglias e violentas
Il disc nov cun 10 chanzuns novas è ina buna novitad per tut ses fans che avevan gia quitads che la creativitad da Dylan tschessia. Il titel dal disc è ina reverenza al musicist Jimmie Rodgers e sia chanzun «My Rough And Rowdy Ways». Rodgers ha vivì dal 1897 fin il 1933, ed è sta ina inspiraziun per Dylan.
«Blowin‘ In The Wind» e «Like A Rolling Stone»
Cun quests tocs e blers auters ha el influenza ina generaziun entira ed er la musica dal 20avel tschientaner, ha vendì sur 100 milliuns portatuns – ed il 2016 ha el survegnì il premi Nobel da litteratura.
En sia carriera hai però da blers auts e bass, temps da success e da crisa, sco durant ils onns 70 ed 80. Dylan è però adina turnà cun discs novs, er uss suenter 8 onns cun in album che cuntegn puspè atgnas chanzuns novas.
Intensiv e chanzuns che van sut la pel
«Murder Most Foul» è in toc calm da sur 16 minutas che raquinta dals onns 60, dal assassinat da John F. Kennedy ed il sentiment da vita da quella giada, sco savens cun in text poetic che fa purtrets e raquinta istorgias – e «False Prophet», cun tuns pli rockus mussa che Dylan è anc adina plain energia ed el fa a savair «I ain’t no false prophet/I just know what I know»: jau na sun betg in faus profet, jau sai simplamain quai che jau sai.
1962 Bob Dylan
1963 The Freewheelin’ Bob Dylan
1964 The Times They Are a-Changin’
1965 Highway 61 Revisited
1966 Blonde on Blonde
1967 John Wesley Harding
1976 Desire
1979 Slow Train Coming
1989 Oh Mercy
1997 Time Out of Mind
2012 Tempest