Emna per emna tadlain nus da la redacziun da musica da RTR novas entradas. Quellas survegnin nus sur differentas plattafurmas online, tramess via mail da labels e promoturs ubain era en furma d’in disc cumpact tramess directamain d’artistas ed artists.
Uschia sa rimnan spert 40, 50 u anc dapli chanzuns sin noss pults. Da quels selecziunain nus tranter 10 e 15 che vegnan lura emessas en il program quotidian dal radio. Dentant betg tuttas chanzuns èn d’udir medem savens. Mintga nov’entrada vegn repartida ad ina categoria.
La musica sin RTR
Per exempel la rotaziun – quai èn chanzuns che vegnan emessas almain ina giada per di e quai sur pliras emnas. Nus avain dentant era ina categoria speziala per l’ura culturala e Vita e cretta la fin d’emna. Tut quellas chanzuns, da pop e rock fin hip hop e folk, chattais ussa mintgamai glindesdi sin noss chanal da Spotify.