Pascal Gamboni, Paula Cadonau ed Andi Schnoz
Avant bunamain 40 onns ha la band englaisa Police publitgà la chanzun «Don’t Stand So Close To Me». La gruppa da musicists enturn Pascal Gamboni ha uss registrà in cover cun text rumantsch adattà a la situaziun actuala. «Sta betg» è naschì tenor in’idea d’Andi Schnoz che ha registrà ina versiun instrumentala en ses studio. Benedetto Vigne ha scrit il text rumantsch che Pascal Gamboni e Paula Cadonau han lura chantà. Ivo Zen ha montà il video tiers.
«el mar»
La gruppa da rock dad Elmar Deflorin ha fatg ina versiun nova da la chanzun principala da l'album «Temps d’esser libers». Era qua han ils commembers da la gruppa filmà ils clips singuls en quarantina. Il video nov tar la chanzun enconuschenta duai illustrar la brama dals umans da turnar ad ina normalitad post-coronica e da sa deliberar da la chabgia sociala che regia actualmain. Però duai il video er regurdar a tut quellas e quels che prestan lavur straordinaria en quests dis, sco per exempel il persunal da tgira ubain la schuldada.
NoFuture
Era la gruppa NoFuture ha fatg ina versiun nova d'ina da lur chanzuns cumprovadas da l’album «il mument» dal 2011. Gia il titel «Dahai» va bain a prà cun la situaziun actuala. Era qua han ils commembers da la gruppa filmà clips divertents en lur dachasa. Els deditgeschan il video a tuttas e tuts che s'engaschan per la societad e che tegnan tut en moviment.
CUCU feat. Nona
In artist che vul pli gugent restar anonims (nus suspectain dentant tgi ch’i è) ha avant curt publitgà in’atgna chanzun per il temp da corona. Ina maschaida rumantsch englaisa.