Siglir tar il cuntegn

Header

cuntegn

Stämpf cun album nov In microcosmos dal rock

A mintgin ses mastergn – tenor quest motto resta il musicist Stämpf fidaivel a sias ragischs musicalas. Quels che pensan dentant i dettia ussa in QL album nov, quels sbaglian.

Tgi na conuscha betg la narra fun punk band QL da Bienna? Quella gruppa che ha fatg covers da divers hits svizzers – per in u l’auter dentant buc exnum megliurà quels. Ina constanta tar QL era adina Stämpf da Cuira. Enfin il 2011 cura ch’el ha bandunà la band. Dus onns pli tard, il 2013, ha el lura publitgà ses emprim album da solo: «Stämpf». Suenter quel n’han ins ditg udì nagut pli dad el. Siat onns èn uss vargads, l’irocais tipic da Stämpf ha fatg plaz ad in mini-irocais sin ses frunt ed uss publitgescha el ses segund album da solo: «Microcosmos».

Durant che l’emprim album da solo ha fatg vegnir endament la band americana Green Day, ha el ussa chattà sias atgnas ragischs musicalas. I sa preschenta pli rockus, genuin e pli fitg «Stämpfig». Gia tar l’emprima chanzun è il num program. «Pedal Down» ha schlantsch è rockus e savess propi instigar d’ir pli spert cun auto. «Alibies And Lies» è ideal per far il «headbangen» – per quels che han anc chavels. Tar «Lost And Found» survegnan ins quaidas da charrar cun cabrio tras la cuntrada e da giudair la vita. Sia vart sentimentala mussa Stämpf cun la chanzun «Let It Rain» ni era tar «Save Me».

Tut en tut ston ins dir, sch’ins cumpra «Microcosmos» survegnan ins ina platta da rock ch’è producida fitg bain, Made in Chur. Musicalmain ston ins schon avair ina ferma tendenza tar il gener da Hard-Rock u College-Rock per chattar access tar quest album. Dentant uss che nus avain dapli temp a chasa renda quai segir ina giada da tadlar. Nus cussegliain quest album sch’ins dastga puspè ina giada far ina saira da gril.

RTR actualitad 09:00