Siglir tar il cuntegn

Header

Mattiu Defuns durant ses concert a la sonda lunga.
Legenda: Mattiu Defuns represchenta la Rumantschia al SUNS festival 2019 ad Udine. RTR, Dominik Hardegger
cuntegn

SUNS festival 2019 Sentupada da linguas minoritaras

Fin november ha lieu per la 12avla giada il SUNS festival ad Udine. In inscunter da differentas minoritads da l'Europa. Per la Rumantschia sa participescha Mattiu Defuns.

Tranter ils 15 ed ils 30 da november è Udine il center da las linguas minoritaras da l'Europa. Il festival en la chapitala furlana è il pli grond da ses gener. Sper musica datti era films e litteratura da minoritads da tut l'Europa. Il punct culminant è dentant la concurrenza musicala da la sonda saira. 10 furmaziuns sa participeschan quest onn. Tranter gruppas che derivan da las Inslas Feroe u dal Pajais Bass enfin da la Sardegna è era il chantautur rumantsch Mattiu Defuns. El represchenta la Rumantschia cun la chanzun «Vesas» che ses bab aveva scrit per l'onda da Mattiu.

2015, 2017 – 2019?

Ils rumantschs èn sa participads dapi l'entschatta dal SUNS festival. Ils davos onns era cun in pau success. Uschia èsi reussi a «Me & Marie» (2015) ed a «Tumasch è» (2017) da gudagnar la concurrenza. Tgi sa forsa è quai era in bun segn per Mattiu Defuns.

Ina sort ESC per linguas minoritaras

Da tut l'Europa sa rimnan furmaziuns da linguas minoritaras ad Udine. Quest onn èn quai sper Mattiu Defuns:

  • «Son of Fortune», Inslas Feroe, feroais.
  • «Sybs», Valisa, gaelic.
  • «Leon Moorman», Pajais Bass, saxon bass.
  • «Silvia Michelotti», Italia (Friaul), furlan.
  • «Ataque Escampe», Spagna (Galizia), galician.
  • «Mocker's», Spagna (Pajais Basc), basc.
  • «Magalì Sare», Spagna, catalan.
  • «Mauresca Fracas Dub», Frantscha (Occitania), occitan.
  • «Malasorti», Italia (Sardegna), sard