Natiralmain n’ha betg la redacziun dal magazin «Rolling Stone» sez elegì lur Top 500 albums. Els han mess ensemen ina giuria da 300 artistas, producents, auturas, labels e schurnalistas. Lezs han lura mess ensemen la glista actuala. Suenter il 2003 e 2012 è quai uss la terza giada ch’il magazin da musica american publitgescha lur rangaziun. Cun in pau in’autra constellaziun da la giuria hai quest onn dà insaquantas midadas.
Beatles «sfundran» – diversitad en avantatg
Tranter l’emprima glista dal 2003 e la segunda versiun il 2012 n’hai betg dà grondas midadas. Sin ils emprims diesch plazs n’hai insumma betg dà roschadas. Quest onn han ils publicaturs scrit en l’introducziun:
Nagina glista è per adina – ils gusts sa midan – novs geners naschan e l’istorgia da la musica vegn adina puspè scritta danovamain.
Perquai han en la giuria actuala era artistas sco Billie Eilish, Taylor Swift u Beyoncé prendì part. La midada en la giuria è senza dubi in motiv che be dus albums èn restads en la Top 10 ch’eran gia en l’emprima versiun là. Numnadamain l’album «Pet Sounds» dals Beach Boys che ha savì tegnair ses segund plaz e «What’s Going On» da Marvin Gaye, che ha stuschà l’album dals Beatles giu dal tron. Marvin Gaye sin l’emprim plaz – in chantadur da pel stgira ch’era da chasa en la musica da Soul ed R&B demussa bain la midada en il pensar da la giuria.
La rangaziun è tut en tut daventada pli diversa, cuntegna uss en general dapli dunnas, pli bleras artistas ed artists da pel stgira, pli pauca musica dals onns 60 e 70 e resguarda era dapli geners. Ils gronds maisters èn dentant anc adina represchentads. Ina pitschna sumbriva en il maletg è che la glista è anc adina fitg americana e linguas sper l’englais n’èn strusch preschentas.
Ils emprims 10 en cumparegliaziun
2003 | 2020 | ||
---|---|---|---|
«Sgt. Pepper’s Lonely Hearts Club Band» | The Beatles (1967) | «What’s Going On» | Marvin Gaye (1971) |
«Pet Sounds» | The Beach Boys (1965) | «Pet Sounds» | The Beach Boys (1965) |
«Revolver» | The Beatles (1966) | «Blue» | Joni Mitchell (1971) |
«Highway 61 Revisited» | Bob Dylan (1965) | «Songs in the Key of Life» | Stevie Wonder (1976) |
«Rubber Soul» | The Beatles (1965) | «Abbey Road» | The Beatles (1969) |
«What’s Going On» | Marvin Gaye (1971) | «Nevermind» | Nirvana (1991) |
«Exile On Main St.» | The Rolling Stones (1972) | «Rumours» | Fleetwood Mac (1977) |
«London Calling» | The Clash (1979) | «Purple Rain» | Prince (1984) |
«Blonde on Blonde» | Bob Dylan (1965) | «Blood on the Tracks» | Bob Dylan (1975) |
«The Beatles» | The Beatles (1968) | «The Miseducation of Lauryn Hill» | Lauryn Hill (1998) |