Durant bun 3 emnas glischa e resuna il «Guaud magic» puspè a Lai. Il festival tut aparti ch’è s’etablì sco punct fix en l’agenda dal temp d’Advent e Nadal vegn era quest onn puspè a pruvar da attrair millis da persunas cun sias attracziuns. Ina da las ingredienzas spezialas da lur recept è il program musical.
Acts da renum naziunal
Sper ina u l'autra band ed artist anc main enconuschent che retschaiva ina schanza da sa preschentar sin la tribuna gronda dal Zauberwald vegnan diversas stailas da la musica Svizra a procurar per in guaud plain.
Uschia Sina che concertescha per l’avertura dal festival. Ella è per il mument sin tournea tras la svizra cun ses nov program ed emplenescha ina sala da concert suenter l’autra. U gust sin Patent Ochsner? As legrar sin quest concert as pon dentant be quels 3000 che han gia in ticket. Il concert è numnadamain gia vendì ora en la prevendita. Alternativas datti dentant avunda! Co fissi cun Bastian Baker? Ni 77 Bombay Street, Pegasus, Kaufmann, ZibbZ u Marius Bear? Hmmm, u forsa tuttina pli gugent Dabu Fantastic?
Per fans da la musica Svizra po quai vegnir grev da sa decider per in u l’auter concert. Mia proposta: daco betg installar ina tenda u la rulotta sper il «Guaud magic»? E lura simplamain ir mintga saira a concert.
Classic Corner
Per l’emprima giada vegnan quest onn era ils fans da la musica classica sin lur custs al «Zauberwald». Quest onn vegn installà ina pitschna tribuna entamez il guaud, glischada vegn quella dad in enorm candelaber sco installaziun da glisch. Sin quest palc vegnan a sa preschentar dus solists, in trio ed in quartet classic.
Program sin il palc classic
| 13 - 15 december | Solo al clavazzin | Mischa Cheung |
| 14 - 22 december | Quartett da corns | Nikita Yankovsky, Andery Simonov, Alexander Kushnarev, Reto Maag |
| 15 - 25 december | Solo al clavazzin | Galina Vracheva |
| 16 - 29 december | Trio clavazzin, violina e cello | Mischa Cheung, Edouard Mätzener, Hitomi Niikura |