En la cronica per il giubileum da 100 onns stat il suandant: Ils prims pass malsegirs ha la musica da Tschlin fatg a partir da l'onn 1873 sut la direcziun da Cla Grand. Ils musicants che sunavan bumbardun e bumbardin, trumbetta, cuntratemp, cornet e clarinetta sajan stads da las famiglias Scharplatz, Janett, Gustin, Starlay e Trombetta.
Exercità han els en la stiva d'in u l'auter musicant en ina glisch flaivla da petroli ed ils chalzers enferrads han dà il tact da mazurcas, galops e valsers. Suenter trais onns ha Cla Grand stuì sa retrair da la musica e ses successur era in «Kapellmeister» cun num Mayer. Lez ha mussà da leger notas e giudeva pensiun libra per el e sia dunna. Suenter trais mais ha el manà la musica il 1876 a la Festa d'uffants a Ramosch e curt suenter prendì cumià da Tschlin e sia musica.
Il 1893 ha lura Gian Gianett Cloetta clamà ensemen ils paucs musicants ch'eran anc e cun agid da forzas giuvnas e blera curascha pudì dar nova vita a la societad. Cloetta ha dirigì fin il 1904 cura ch'el ha bandunà la regiun en direcziun Tusaun. E danovamain era l'avegnir da la musica intschert. Il 1908 ha lura il magister Men Janett surpiglià la bitgetta.
Tschlin ed ils Janetts
Men Janett ha dirigì la musica fin sia mort l'onn 1963. Durant 55 onns ha Men Janett fatg lavur nunstunclentaivla cun gronda perseveranza e cumpetenza musicala. Ed era auters commembers da la famiglia han marcà l'istorgia da l'uniun. Il figl Cla ha surpiglià la direcziun il 1963 e lura surdà il 1986 la bitgetta al nev Duri. Lez ha dirigì la societad da musica duas giadas. L' emprima giada dal 1986 fin il 1997 e la segunda giada dal 2006 fin il 2019. Passa 100 dals ultims 150 onns ha uschia in commember da la famiglia Janett dirigì la Società da musica Tschlin.
Festa da giubileum
In giubileum da 150 onns na datti betg usche savens. Perquai èsi adina stà cler ch'i dettia ina festa. Quella ha lieu ils 24 da zercladur 2023. Il president actual Peder Andri Arquint davart il program da la festa da giubileum:
La stad fa la societad lura era anc ina festa d'engraziament per ils voluntaris, donaturs e sponsurs che gidan adina puspè a la musica. Sco quai ch'il president ha era tradì dettia lura eventualmain era in viadi.
150 musica da Tschlin – 53 onns cun Gisep Gustin
Cumenzà la carriera ha Gisep Gustin cun entrar en la musica da mats durant las davosas classa da scola. Gisep Gustin vegn in november 69 onns e suna oz la posauna. Ma a l’entschatta ha el cumenzà cul bass.
Mes bab sunava il bass e tuts han ditg, lura vegn era Gisep in bassist.
Da quel temp mancava in bassist en la societad ed uschè ha el entschet cul bass. Durant 53 o in terz da l’existenza da la societad suna el en la societad da musica cun plaschair e grond engaschament. Da pli baud ins sunava plitost musica da marsch e polcas, ma era la musica moderna til plascha fitg bain. Per el ha l’amicizia ina fitg gronda valur. El va anc oz gugent a provas da musica per as preparar sin concerts e festas.
Proxima sonda ha lieu la festa da 150 onns societad da musica Tschlin nua cha Gisep Gustin è il responsabel per l’infrastructura.
Novas registraziuns
Quest onn è la Società da musica Tschlin er s'annunziada per las registraziuns da tun e maletg che RTR ha offrì. La finala ha ella pudì registrar dus tocs (guarda videos). Vitiers è la Società da musica Tschlin da vesair en in video ord l'archiv da SRF. Il 1985 è ella sa participada a la concurrenza da cumposiziun «Concours MusiCHa» ed è sa preschentada en la televisiun cun la cumposiziun da Werner Horber «Salüds da Tschlin».
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.