Da l'iniziativa d'intginas musicantas e musicants laics e da professiun enturn Walter Blumer ed en collavuraziun cun il chor baselgia St. Martin e ses cantor Heinz Girschweiler è sa furmada il 1994 ORCHESTRINACHUR – in orchester da var 20 persunas. Sper las activitads per la plaiv ha l'orchester dà agens concerts cun ovras en spezial ord il temp dal baroc e da la romantica. Pli tard lura er ovras dal 20avel tschientaner. Tschintg onns suenter la fundaziun è la furmaziun sa distatgada da la plaiv e dapi lura datti mintg'onn dus fin trais concerts tematics.
Impressiuns da l'orchester
-
Bild 1 von 7. ORCHESTRINA. Orchestrina exista dapi 30 onns. Bildquelle: Orchestrina.
-
Bild 2 von 7. Orchestrina en moviment - a dretg. Bildquelle: Orchestrina.
-
Bild 3 von 7. Orchestrina en moviment - a sanester. Bildquelle: Orchestrina.
-
Bild 4 von 7. Primviolinista Ruth Michael. Ruth Michael suna dapi l'entschatta en l'orchester. Bildquelle: Orchestrina.
-
Bild 5 von 7. Viadi cun tren. Orchestrina dat concerts en diveras parts dal chantun Grischun. Bildquelle: Orchestrina.
-
Bild 6 von 7. Lavur davos las culissas. Sper far emprovas datti adina puspè lavur administrativa, er commembras e commembers sa gidan. Bildquelle: Orchestrina.
-
Bild 7 von 7. ORCHESTRINA. Fundà il 1994 e dapi lura creà ina plivalur da la vita culturala grischuna. Bildquelle: Orchestrina.
Suenter ch'ins n'era betg dal medem avis davart l'avegnir ha l'orchester terminà la collavuraziun cun Heinz Girschweiler ed è ì a la tschertga per sia successiun. Cun Beat Fehlmann (clarinetist ed anteriur intendant da la Kammerphilharmonie Graubünden) e Christian Klucker (scolast da musica a la Scola chantunala e dirigent da chor) han els gì dus interessents qualifitgads. Cun els dus han els mintgamai fatg ina retscha da concerts:
- october 2010
ORCHESTRINA CHUR & TANGO SENSATIONS (cun Jürg Luchsinger, solist a l'accordeon) cun Beat Fehlmann - avrigl 2011
ORCHESTRINA CHUR & ITALIANITÀ (cun Gion Andrea Casanova, solist al fagot) cun Christian Klucker
Alura è la furmaziun sa decidida per Beat Fehlmann ed ha sunà cun el duas ulteriuras retschas da concerts. Cura che Beat Fehlmann è lura il 2012 vegnì elegì sco intendant da la «Philharmonie der Nationen» ha ORCHESTRINA CHUR danovamain stuì tschertgar in nov dirigent u ina nova dirigenta.
Tschep fidaivel da commembras e commembers
Dapi l'entschatta è Ruth Michael primviolinista e dapi il 2012 è la cellista Anita Jehli la dirigenta. Ella è parzialmain manadra da la scola da musica Plaun (Imboden) e suna cun divers orchesters. Cun ella hai jau pudì discurrer davart sia lavur cun l'orchester, finamiras e proxims plans.
Per ses divers concerts da giubileums lascha l'orchester regularmain scriver novas cumposiziuns. L'emprima primaudiziun è stada il 2001, ina cumposiziun da Anny Roth-Dalbert, in concert per clavazin ed orchester cun la solista al clavazin Seraina Janett. Il 2017 han els sunà «Urdensee – Fantasie für Vibraphon und Streichorchester» da e cun Eckart Fritz (percussiunist da la Kammerphilharmonie Graubünden) e cun l'actur Christian Sprecher sco raquintader. Per il giubileum da 25 onns han els sunà per l'emprima giada «Feuer, Erde, Luft und Silber» da Mario Giovanoli e per il 30avel han els laschà scriver Robert Grossmann l'ovra «Bernina-Express».
L'entir concert che l'ORCHESTRINA ha dà il favrer 2024 a Cuira è er d'udir sin Playfestas e l'ovra Bernina-Express datti er d'udir sin neo.mx3.ch, là er cun il video.
Quest atun dat l'orchester anc trais concerts cun la musicista Kristina Brunner (orgelin) ed in program interessant. Tranter auter l'ovra da Markus Flückiger per orgelin ed orchester «Alp Rabauz». Per ils concerts da giubileum («30 onns on tour») han els envidà la solista Kathrin von Cube (viola) per sunar il «Concerto per viola en C» da Joseph Martin Kraus. Vitiers han els sunà l'uvertura da «Filosofo innamorato» da Florian Leopold Gassmann e la «Sinfonia nr. 44 en e-mol» da Joseph Haydn.
